Mäğlüm bulğança, yäkşämbe könne Rusiäneñ 14 töbägendä cirle parlamentlarğa saylawlar ütte. Omski ölkäsendä saylaw şähär şurasına häm qanunnar çığaru cıyılışına buldı. Yaqınça isäpläwlär buyınça “Berdäm Rusiä” firqäse berençe urında, ikençe bulıp kommunistlar bara. Saylawçılar Omski ölkäsendä şaqtıy aktiv qatnaştı – saylarğa xoquqları bulğannarnıñ 50,8 üzläre telägän nämzätlärgä tawışların birdelär. Tatarlardan bu saylawlarda öç nämzät qatnaştı. Alarnıñ ikese – açıq aksionerlar cämğiäte “Sibnefet'-Omski NPZ”, yäğni neft' eşkärtü zavodı general' direktorı İldus İrek ulı Särvärov häm açıq aksionerlar cämğiäte “Omsk-prigorod” general' direktorı Rawil Äxmät ulı Bikbavov uzğan çaqırılış deputatları, ä berse – ölkä balalar klinik xästaxanäse baş tabibı Marat Şaken ulı Äderbaev nämzät bularaq saylawlarda berençe märtäbä qatnaştı. Särvärov häm Bikbavov äfändelär, “Berdäm Rusiä” firqäse wäkilläre, ber mandatlı saylaw okrugları buyınça köndäşlären küpkä artta qaldırıp deputat bulıp saylandılar, mäğlümat çaraları bu xaqta inde tögäl xäbär itte. Bilgele, “Berdäm Rusiä” firqäse isemlegendä 4-nçe bulıp terkälgän Marat Äderbayıwnı da inde deputat mandatın ayuladı dip äytergä bula.
Särvärov häm Bikbavov äfändelär Omski tatarlarınıñ xacätlären berniqädär belep, yärdäm itkäläp toruçılar, Marat Şakenoviç yaña keşe, ämma anıñ üze citäklägän klinikanı ürnäk itep totuı bilgele.
Rozaliä Sayganova, Omski