Qazanda - Ästerxan tatarları

Milli cämäğätçelek bu könnärdä tik kenä tormıy. Kamal teatrı binasında Ästerxannan kilgän 90 keşelek üzeşçän sänğat ostaları tatar xalqınıñ bügenge sänğaten, yäş talantların kürsättelär. Ästerxan ölkäseneñ “Duslıq” cämğiäte räise Änwär Almaev ber täwlek buyı avtobuslarda Qazanğa kilgän millättäşlärebezneñ bu säyäxäten oyıştırğan. Çığış yasawçılar arasında qazanlılarnı şaqqatırğan talantlı şäxeslär dä bar. Ästerxanlılarnı täbrik itärgä Qazan şähäre başlığı Kamil İsxakov, Tatar kongressı citäkçese İndus Tahirov, mädäniät ministrı urınbasarı İlfaq İbrahimov, Kamal teatrı direktorı Şamil Zakirov ta säxnägä çıqtı. Änwär Almaev alarğa räxmät äytep büläklär birde, 10 yıl buyı milli eşlärdä ästerxanlılar belän bergä bulğan İndus Tahirovnı “bezneñ ätiebez”, dip atadı.