Qazan Universitetı 200 yıllığına äzerlänä

Sişämbe, 28 may könne, Qazan kremlendä prezident Mintimer Şäymiev citäkçelegendä ber cıyılış uzdı. Ul Qazan däülät universitetınıñ 200 yıllıq yubileen oyıştıru eşlärenä bağışlandı. Şunısın da äytergä kiräk, bu oyıştıru komitetınıñ ikençe cıyıluı. Anıñ berençese inde 2001 yılda uq, ber yıl elek uzğan ide. Şuşı ber yıl eçendä universitetta şaqtıy zur üzgäreşlär buldı. İnde belgänegezçä, bu uqu yortında yaña rektor saylandı. Oçraşu waqıtında universitetnıñ xäzerge xäle, respublikanıñ ğına tügel, xättä Rusiäneñ dä iñ märtäbäle yuğarı uqu yortlarınnan berse bulıp sanalğan universitetnı üsterü programması qaraldı, bäyräm çaralarına äzerlek tikşerelde, yubileynı oyıştıru öçen ştab tözelde. Utırışnı Tatarstan prezidentı Mintimer Şäymiev alıp bardı, çönki ul universitetnıñ yubileen oyıştıru komitetı räise bulıp tora. Universitetnıñ rektorı Mäqzüm Säläxov üzeneñ çığışında, inde küp kenä eşlär eşlängän, läkin eşlise äle tağın da kübräk, dip äytte. Anıñ süzlärenä qarağanda, eşne totqarlauçı iñ zur problema -- finanslar citmäw. Mintimer Şäymiev, bernindi qıyınlıqlarğa da qaramıyça yubileyğa äzerlek çaraların kürergä kiräk, çönki bäyräm inde yaqınlaşıp kilä, ä bez uylanılğan plannarnı çınğa aşıruda äle bik küpkä artqa qalabız, dide. Cıyılışta şulay uq vitse-premier Zilä Wälieva, Aleksey Paxomov, Qazan şähäre başlığı Kamil İsxakov, ğalimnär, başqalanıñ yuğarı uqu yortları citäkçeläre qatnaştılar. Çärşämbe könne, köndezge säğät 12-dä, Qazan däwlät universitetında küptän tügel genä saylanğan rektor Mäqzüm Säläxovnıñ wazıyfağa kerü tantanası uzdı.