“İntertat” agentlığı xäbär itkänçä, comğa könne Qazan milli-mädäni üzägendä ber üzençälekle çara başlanıp kitte. Ul “Rusiädä häm Germaniädä federalizm” dip atala. Bu yulı fänni konferensiädä qatnaşuçılar Rusiädä häm alman cirendä tuplanğan täcribä turında fiker alışaçaqlar. İke könlek konferensiäne dürt sessiädä alıp baru küzdä totıla. Berençe sessiä federatsiä sub'yektlarınıñ statusına bağışlanaçaq. Başqarma xakimiät strukturaları ikençe sessiädä qaralaçaq. İllärdä finans-salım sistemasın öyränüçelär öçençe sessiägä çaqırıla. Ä inde “federalizm” digän töşençäneñ nigezlären dürtençe sessiädä tikşeräçäklär. Konferensiä eşendä federalizm mäs’älälären öyränüçe Almaniä ğalimnäre, Rusiä yağınnan Qazan, Petrozavodsk, Ufa, Yekaterinburg, Irınbur häm Mäskäwdän dä säyäsi belgeçlär qatnaşaçaq.
Añlaşıla ki, federalizm ul näticädä üzäk häm töbäklär arasında wäqälätlär büleşügä qaytıp qala. Küräseñ, andıy problema Rusiädä genä tügel, Almaniädä dä bar. Konferensiäneñ maqsatı – ike ilneñ täcribäse aşa uñay näticälärgä ireşü yulların tabu.