28 avgust könne Tatarstan prezidentı Mintimer Şäymiev çit il jurnalistları delegatsiäsen qabul itte. İnde xäbär itkänebezçä Jurnalistlar berlekläreneñ xalıq-ara konfederatsiäse oyıştırğan delegatsiägä Rusiä, BDB häm başqa çit illärdän 35 mäğlümat çarasınıñ 48 jurnalistı tuplanğan. Delegatsiäne konfederatsiäneñ särqatibe Aşot Djazoyan citäkli.
Oçraşu başında Mintimer Şäymiev jurnalistlarğa “ozaq yıllarğa suzılğan reformalarnıñ töp qazanışı süz irege häm şäxes irege” dip sanawın assızıqlap äytte dielä räsmi xäbärlär dä. Annan soñ ul jurnalistlarğa respublikadağı sotsial'-iqtisadıy xälne qısqaça söyläp birde. Respublikada effektlı iqtisadıy model' buldıra alğanğa kürä, tulı ber sotsial' programmalar tezmäse tormışqa aşırıldı. “Tuzğan toraq” programması 7 yıl eçendä 40 meñ ğailäne yaña fatirlar belän tä'min itte.
Gazofikatsiä programmasın tormışqa aşıru Tatarstan xalqın yağulıq, ä telefonlaştıru programması- elemtä belän tä'min itte. Xäzerge waqıtta başqarıla torğan yaña programmalar- mäglümätläşterü häm ipoteкa programmaları turında da äytep kitelde. Awıl-xucalığına qarata da ayırım mönäsäbät- däwlät yärdämennän taşlamaw yaxşı näticälär kiterä. Aşlıq citeşterüdä bez Krasnodar krae däräcäsenä ireştek dide oçraşu da Mintimer Şäymiev. Anıñ äytüençä bıyılda äle urıp-cıyu eşläreneñ yartısı ğına başqarılsa da, aşlıq gektardan 30 sentner çığa häm barlığı 5 million tonna uñış cıyılır dip farazlarğa bula. Mäğlüm ki jurnalistlar delegatsiäse vizitı “Qazan forumı” dip atala. Vizitnıñ töp maqsatı da Qazannıñ 1000 yıllığına äzerlek eşläre belän tanışu. Şuña kürä oçraşuda jurnalistlar iñ berençe Qazannıñ 1000 yıllığın, Sankt-Peterburgnıñ 300 yıllığı belän çağıştırıp bulamı digän soraw birdelär. Mintimer Şäymiev ul yubileynıñ maqsatı Peterburnı dönya cämäğätçelegeneñ tarixı qazanışı itep kürsätü bulsa, Qazan yubiley şähär xalqı öçen bäyräm bulırğa tieş digän fiker äytte. Yäğni yubiley uñayınnan şähär xalqı öçen küp kenä faydalı eşlär başqarılırğa tieş. İnde xäbär itkänebezçä jurnalistlar çärşämbe könne Tatarstandağı töp konfessiälär: xristian, yähüd, islam dine ruxaniları belän oçraşıp çıqtılar. Tatarstan prezidentı respublikada konfessiä-ara tatulıq, ämma anı Rusiädä möselman liderları arasındağı üz-ara kileşmäwçelek borçıy dide. Anıñ fikerençä möselman ruxaniları ber urtaq fikergä kilep berläşergä tieş. Bu berläşü Mäskäw tiräsendä bulırğa mömkin. Qazan Rusiäneñ Mäkkäse buluğa däğwä itmi. Mintimer Şäymiev jurnalistlarğa Tatarstanda millät-ara mönäsäbätlärdä dä qarşılıqlar bulmawın äytte. Läkin mondıy qarşılıqlarnı yasalma kiterep çığaru mataşuları bar. Mondıy mataşularnı qatği tuqtataçaqbız dide Mintimer Şäymiev. Jurnalistlar berlekläre xalıq-ara konfederatsiäse delegatsiäseneñ Tatarstanda bulu programması bäyräm kön çaralarına totaşa. Programmağa kergän çaralar turında aldağı tapşırularıbız da.Yunıs Ätnäle.