Comğa könne respublikanıñ sälämätlek saqlaw ölkäsendä zur yubileynı bäyräm ittelär. 12nçe sintäberdä böten Tatarstanda ğına tügel, kürşe-tirä töbäklärdä dä kiñ bilgele bulğan respublika klinik xästäxänäse üzeneñ 50 yıllığın bilgeläp ütte. Yılına 29 meñ awırunı däwalawçı älege xästäxänädä 2600dän artıq meditsina xezmätkäre eşli. Yubiley uñayınnan ütkärelgän tantanalı çarada alarnıñ barısı da qatnaşa almasa da, tabip eşe yallarnı häm bäyrämnärne belmi bit, Tatarstan parlamentı citäkçeseneñ cılı qotlaw süzläre respublika klinik xästäxanäsendä eşläwçe här xezmätkärgä yullanğan ide. Comğa könne ük xästäxänädä tağın ber bülek – gemodializ bülege açıldı.
Saylawlar ütkärü täcribäsen öyränü öçen Tatarstanğa Fälistin milli xakimiäteneñ delegatsiäse kilüe turında inde xäbär itkän idek, xörmätle tıñlawçılar. Bu könnärdä alar Qazanda törle oçraşular ütkärep yöri. 12nçe sintäber könne älege delegatsiä wäkillären respublikanıñ parlamentı räise Färit Möxämmätşin qabul itte. Söyläşü waqıtında süz ike ilneñ saylaw sistemaları, mart ayında uzaçaq Tatarstan Däwlät Şurasına saylawlar turında bardı. Şulay uq, Yaqın Könçığışta soñğı waqıtta ayıruça qatlawlılanğan wäzğiät xaqında da fikerlär alışındı. Färit Möxämmätşin bezneñ respublikağa iğtibarları öçen fälistinlelärgä räxmätlären dä belderde, dip xäbär itä İntertat.ru agentlığı.
Gölnaz İlgizär