Saylawlar yaqınlaşqan sayın, respublikada da saylaw aldı kampaniäse qıza bara. Niçek disezme? Kem niçek buldıra ala inde. Kemder fatir sayın üzeneñ räseme häm eşlägän yaxşı eşlär isemlege belän käğäz tarattıra, kemder yışraq televizor ekrannarına elägergä tırışa. Ä kemder üzeneñ köndäşlären mäxkämägä birä. Menä mäsälän Rusiä Dumasınıñ xäzerge häm kiläçäktä dä bulırğa ömetlängän ber deputat anıñ belän ber saylaw okrugınnan terkälgän ikençe ber nämzätne mäxkämägä birgän. İmeş, şähär uramnarında elenep torğan anıñ şirkäteneñ reklaması, nämzätneñ üzeneñ reklama bulıp tora ikän. Dimäk, bu reklama bulaçaq deputatnıñ räsmi saylaw fondınnan tülänergä tieş. Şulay bulmasa, älege fakt saylaw qanunnarına turı kilmi. Menä şuşı eşne Tatarstannıñ Yuğarı mäxkämäse comğa könne qaradı. Anıñ qararı älegä bilgesez, läkin busı inde ällä ni möhim dä tügelder. Mäxkämägä möräcäğät itkän nämzät üzen namuslı, ğädel keşe itep kürsätüenä ireşte bit. Xäyer, saylaw qanunnarı tögäl ütälsen dip nämzätlär genä tügel, ğadi keşelär dä bik borçıla ikän. İnde xäbär itkän idek, respublikanıñ Eçke eşlär ministrlığı xalıq qanun bozu oçraqların alarğa totqarlawsız citkerä alsın öçen qaynar telefon liniäse açqan ide. Ministrlıq wäkilläre süzlärenä qarağanda, anda bik küp keşe şaltırata ikän. Bar şaltıratular da saylawlarğa qağılmasa da, ağımdağı ayda mäsälän, çınlap ta qanun bozu oçraqları turında inde 20läp şiqäyät kilgän. Här oçraqnı militsiä xezmätkärläre şunda uq tikşerergä tırışa ikän.
Tatarstannıñ iñ tanılğan nämzäte dä tik utırmıy. 13 noyäber könne Mintimer Şäymiev Qazanda uzğan TEFİ-region televizion bäygeseneñ yomğaqlaw kiçäsendä qatnaştı. Bu xaqta bez soñraq äle tulıraq itep söylärbez. Comğa könne isä Yedinaya Rossiä firqäseneñ räistäşe çirattağı yaña tözeleşne açtı. Bu yulı – Qazanda bik qısqa waqıtta häm zur ser astında ğına tözelgän Akvaparknı. Bik azsanlı mäğlümatlarğa qarağanda, älege Akvapark Rusiädä iñ zurlarnıñ berse bulaçaq, anıñ mäydanı 50 meñ kvadrat metrnı täşkil itä ikän.
Ä menä respublika prezidentı wazifaların başqaruçı premyer-ministr Röstäm Miñnexanovqa bu könnärdä ikelätä eşlärgä turı kilä. Äle citmäsä – Tatarstanda ğına da tügel. 12nçe noyäber könne ul Mäskäwdä, Rusiä prezidentı Vladimir Putin belän bergä İndia premyer-ministrı belän oçraştı. Alar ber östäl artında utırıp ike il arasındağı xezmättäşlek turında söyläşte. Ä annarı soñ Röstäm Miñnexanov Tatarstan xökümäte isemennän İndiyäneñ Andxra-Pradeş ştatı belän iqtisadi, fänni, mädäni xezmättäşlek turında kileşü imzalandı. İndiya yağınnan kileşüne respublikanıñ Tışqı eşlär ministrı imzaladı. 13nçe noyäber könne Röstäm Miñnexanov Qazanğa qaytıp respublika Däwlät Şurası komissiäsendä 2004nçe yılğa byudjetnı tikşerüdä qatnaştı. Comğa könne isä premyer-ministr Tatarstanğa kilgän Bolğariä respublikası wäkillären qarşıladı, delegatsiädäge eşmäkärlär belän eşlekle söyläşülär alıp bardı.Gölnaz İlgizär