Tatarstanda «Bällür qäläm» - cidençe jurnalistlar bäygese uzdı. Bu xaqta «Azatlıq» radiosı tıñlawçılarına Tatarstan jurnalistları tulı mäğlümat citkerde inde.
Östäp şunı ğına äytergä kiräk, älege bäygedä bıyıl 13 nominatsiä iğlan itelgän ide. Şularnıñ bersendä — yäşlär öçen nominatsiädä qatnaşuçılar arasında Udmurtiädä çığıp kilüçe «Yañarış» tatar gazetasında berençe mäqälälären bastırğan, bügen Qazan däwlät universitetı jurnalistika fakul'tetınıñ öçençe kurs studentkası Rämzilä Xörmätova ciñüçelär isemlegendä. Rämzilä üzeneñ «Bällür qäläm» bäygesendä ciñü yawlawı belän bik şat, bu xaqta ul bolay dide;
—audio—
Rämzilä Xörmätova isemen Tatarstanda çığıp kilüçe basmalarda kürergä mömkin, şul uq waqıtta Rämzilä «Yaña ğasır» televideniese belän dä xezmättäşlek itä başlağan, radiojurnalistikada da üzen sınap qararğa niäte bar.
Törle seminar, tügäräk östäl söyläşülärennän tış ta bügen tatar jurnalistları aldında torğan problemalar xaqında ayırım oçraşularda da küp fiker alışınıldı. Ul'yan ölkäse tatarlarınıñ «Ömet» gazetası citäkçese İsxaq Xälim üzläreneñ alay zur problemaları bulmawın, kollektiv stabil', näticäle eşli dip basım yasadı.
Samarada 15 yılğa yaqın çığıp kilüçe «Berdämlek» gazetasınıñ baş möxärrire Räfqät Ähliullin atnalıq gazetanı millättäşlärebezneñ yaratıp qabul itüläreneñ dälile bularaq, uquçılarnıñ xatları dip sanıy. Kön sayın redaksiä poçtasında unğa yaqın xat buluı, älbättä, söyeneçle küreneş, dip basım yasap, möxärrir bolay dide
—audio—
Bigräk tä uquçılarnı qızıqsındırğan temalar basılıp çıqqaç, xatlar sanı arta dip däwam itte Räfqät ağa. Monda berençe yıllardan uq daimi çığıp kilüçe säxifälärneñ dä küñellärdä qızıqsındıru uyatuı zur.
Başta gazetanı uquçılar üz waqıtında tatar telendä belem alğan millättäşlärebez bulsa, ämmä yıldan yılğa tirajnıñ saqlanıp qaluı yäşlärneñ dä tuğan telendä basmalar belän qızıqsınuınıñ dälile, di Räfqät ağa. Yazılu bäyäse dä arzan tügel, ämmä şuña da qaramastan tiraj saqlandı. Monda tağın şuşı uq gazeta uquçılarnıñ zäwığına basmanıñ eçtälege turı kilüennän dip sanıy möxärrir.
Redaksiägä ölkä tarafınnan kiräkle summanıñ bik az küläme genä byudjettan birelüen, gazetanı atna sayın näşer itü öçen üzläre yulların tabuın citkerde äñgämädäşem.
—audio—
Mäskäwdän yıraq bulmağan Tübän Novgorod ölkäsendä dä millättäşlärebez küp yäşi. Anda Qızıl Oktäber rayonında 17 awılda tatarlar tuplanğan. Bu rayonda ütkän ğasırnıñ utızınçı yıllarında uq tatar basması bulğan. Ämmä 60nçı yıllarda ul näşer itelmi başlağan. İnde 90nçı yıllarda bu töbäktäge tatarlar da üz basmasın kire qaytaru xästären kürälär. Bu rayon administratsiäse başlığı itep tatar millätennän bulğan keşe bilgelängäç mömkin buldı, dip urtaqlaştı bügen rus häm tatar tellärendä çığıp kilüçe rayon gazetasınıñ baş möxärrire Qamil Fätxullin. Gazeta atnasına öç tapqır 12 bittä dönya kürä, alarnıñ ikese rus telendä bulsa, comğa könne ul tik tatar telendäge basma bulıp millättäşlärebezne söendärä. Urıslar üzägendä tatarlıqnı saqlap qalu ciñel tügel, di Qamil Ramil ulı.
—audio—
Başqa töbäklärdäge basmalar belän çağıştırğanda gazetanıñ finans mömkinlege uñay xäl itelä. Qamil Fätxullinnıñ üzen tıñlıyq äle.
—audio—
Şul uq waqıtta törle konkurslar iğlan itep, ciñüçelärgä dä büläkläw öçen aqça tabalar. Tağın rayonda yäşäwçelärneñ bik zur xıyalı da bar. Tatar telendä jurnal näşer itü.
—audio—
Sez Ul'yan, Samara, Tübän Novgorod töbäklärendä näşer itelüçe basmalar xaqında İsxax Xalim, Räfqat Ähliullin, Qamil Fätxullin belän yazmalar tıñladığız.
Alarnı Xämidä Ğayfullina äzerläde.