Bu atnada «Qazan» hawa alanınıñ häm «Tatarstan» aviakompaniäseneñ satıluı turında iğlan itelde. Bu könnärdä satıp aluçılardan ğarizalar qabul itü başlandı. Alış-bireş 20nçe avgustqa bilgelängän. Şirkätlärneñ satıluı, alarnıñ bankrotlıqqa çığuın añlatmıy. «Tatarstan» aviaşirkäte citäkçese urınbasarı äytkänçä, Tatarstannıñ aviaşirkäte, eşen tuqtatu tügel, ä çäçäk ata ikän. «İnterfax» agentlığı birgän mäğlümatlarğa qarağanda, şirkät Rusiä eçendä häm xalıq ara hawa yullarında eş itä. Passajirlarnı häm tovarlarnı yıraq aralarğa yörtä.
Ütkän 2002 yılda aviaşirkätneñ tabışı 347 meñ genä bulğan bulsa, 2003 yılda «Tatarstan» aviaşirkäte 17,8 million sum tabış kitergän.Zamanında «Tatarstan» aviaşirkäte Qazan, Tübän Kama häm Bigişevo aviaşärkätläreneñ milke nigezendä, xosusıylaştıru näticäsendä oyışqan ide. Şirkät birgän mäğlümatlarğa qarağanda «Tatarstan» aviakompaniäse 23 oçqıçqa iä. Alar arasında Tu-154, Tu-134, Yak-40 häm An-24 oçqıçları bar.
Şirkätneñ direktor urınbasarı äytkänçä, däwlät qulında bulğan aksiälärne satılğan oçraqta, «Tatarstan» aviakompaniäseneñ üseşenä yaña etärgeç bireläçäk. İnvestitsiälär bulsa, şirkät cihazların yañartır ide, ğomumän yaña basqıçqa kütäreler ide, dide aviaşirkät wäkile.Üzgärtep qorular, bazar şartlarında köndäşlek itä belü – «Tatarstan» aviaşirkäte öçen - bik aktual mäs’älä. Tatarstanda xäzer çit il, Rusiä şirkätläre kilep, cirle kompaniälärne oçular oyıştıru bazarınnan qısrıqlıy başladı. Mäsälän, Tatarstan mäğlümlät çaralarında xäzer, Mäskäwgä bik arzan bäyägä oçarğa dip, mawıqtırğıç täqdimnärgä külämle reklama bara. Süz «Tatarstan» şirkäte tügel, ä anıñ köndäşläre yasağan täqdimnär turında bara. Avia şirkätneñ 100% aksiäläre 457,7 million sumnan satıla başlıy. Auksionda bäyälär üsä torğan bula, şuña kürä, «Tatarstan» şirkäte bu satu belän küpme aqça qazanır - äle ber kem belmi.
«Qazan» hawa alanı da satuğa çığarıla. Ul «Tatarstan» aviä şirkäteneñ töp aeroportı bulıp tora. Anıñ 100% aksiäse 73,7 million sumnan başlap satıla başlayaçaq. Alış-bireş 20nçe avgustqa bilgelängän. Bikä Timerova.