1 sentäberdä respublikada Belem könen bäyräm ittelär. Şuña da, Mäskäwdäge sişämbe kiçendäge şartlaw, Tönyaq Osetiädäge faciğäle waqiğalar xaqında küpçelek tatarstanlılar kiçen öygä qaytqaç qına belde. Ä menä respublikanıñ Eçke eşlär ministrlığı mäğlümätlärenä qarağanda, mäktäplärdä bu könne qurqınıçsızlıq çaraları köçäytelgän, här mäktäptä 1 sentäber könne militsiä xezmätkärläre dejur torğan. Ğomumän, Rusiäneñ törle töbäklärendä soñğı arada yışayğan terror oçraqları nisbätennän, Tatarstanda da saqlıq çaraları köçäytelde. Bu xaqta çärşämbe könne uzğan jurnalistlar belän oçraşuda respublikanıñ Eçke eşlär ministrlığı wäkilläre belderde.
Tatarstan prezidentı Mintimer Şäymiev tä çärşämbe könne Tönyaq Osetiädäge faciğäle xällärgä üzeneñ mönäsäbäten belderde.
Qızğanıçqa qarşı, terror törle formalarda ğädäti xälgä äylänep bara. Minemçä, cämğiät öçen monnan da qurqınıç närsä yuqtır. Äle menä küptän tügel genä ike oçqıç şartladı, kiçä genä Mäskäwdä şartlaw buldı... İnde menä bügen Osetiädä balalarnı äsir itep, alar aşa taläplär quyalar. Min monı keşesezlek dip atar idem, çönki nindi genä kisken problemalar bulmasın, balalar tormışın qurqınıç astına quyu – märxämätsezlekneñ nindi çağılışı ikänen dä äytä almıymMintimer Şäymiev Tönyaq Osetiädäge faciğäle xällär xaqında menä şundıy fikerdä tora.
Gölnaz İlgizär