Tatarstan konstitutsiä köne, 7 noyäber bäyräme ictimaği, köndälek tormışta sizelmi genä ütep kitsä dä, matbuğatta ez qaldırıp kitte.
Tatarstannıñ töp qanunı, anıñ ähämiäte, qabul itü waqıtı, anıñ tatar xalqına närsä birgäne xaqında «Mäğrifät» gäzite «Küñeldä bäyräm barmı?» digän yazma bastırdı. Ul Tatarstan deputatlarınıñ cawaplarınnan tora. Mäsälän, Razil Wäliev anda, konstitutsiä köne minem öçen milli bäyräm, dip cawap birä. İndus Tahirov , bez möstäqillek turında deklaratsiäne, töp qanunnı qabul itep, Rusiäne federativ däwlät itä aldıq, dip fikeren belderä.
«Şähri Qazan» gäzite, barısınnan da uzdırıp, «Tatarstan – suveren demokratik däwlät» digän baş astındağı mäqäläne bastırdı. Gäzit xäbärçese Äğzam Fäyzraxmanov,1992nçı yılda Tatarstan Yuğarı Şurasında niqädär qaynar bäxäslärneñ barğanın, cämäğätçelek wäkilläre arasında töp qanunnıñ tekstı tikşerelüen, aña 5 meñnän artıq tözätmä äzerlänüen, bäenä-bäynä yazıp çığa. Şul uq waqıtta, ul, Rusiä Prezidentı täqdimnäre xuplanu säbäple, Tatarstannıñ töp qanunğa tözätmälär kertelü mömkinlegen dä iskärtä. Ämma mäqäläneñ axırında Äğzam Fäyzraxmanov, kiläçäktä, küp millätle Tatarstan xalqıñ respublika däwlätçelegeneñ nığuına ömetlänä, digän belderü yasıy. «Watanım Tatarstan» gäzite konstitutsiä köne belän Prezident qotlawın ğına bastırdı. Şul uq sanda, şul uq bittä, 7 noyäber bäyräme urınına polyak basıp aluçılarnı ciñü könen bilgeläp ütügä qarata qazanlılar arasında ütkärelgän soraştıru näticäläre urın aldı. Cawap birgän kommunistlar wäkile, yaña bäyrämnärgä qarşı tügel, läkin iskelärne qaldıru yağında bez, dip belderä anda. Tatar kongressı xezmätkäre, östän quşılğan bäyrämnärne xalıq qabul itmi, dip mäs’äläneñ ikençe yağına iğtibarnı yünältä. Bilgele jurnalist, qaraşın beldergändä, bäyräm kalendargä kertelsä, möselmannar anı qabul itmäyäçäk, di. Soraştıruda qatnaşqan başqa bilgele keşelär dä, pravoslav dine tarixına bäyle waqiğanıñ urıs bulmağan xalıqlarğa tağılğanın yaratmawın añlata.
Bikä Timerova.