Yäkşämbedä Tatarstannıñ çat kürşese Mari El respublikasında prezident saylawları ütte. Rusiä prezidentı töbäk citäkçelären üzem bilgelim dip torğanda, Mari El xalqınıñ 62 protsentı, töbäk citäkçesen saylap quydı. Saylawlar ällä ni yañalıq alıp kilmäde. Älegä qädär respublika belän citäkçelek itkän Leonid Markelov ciñep çıqtı. Saylawlarda qatnaşqan xalıqnıñ 56 protsentı anıñ prezident bulıp qaluın teläp tawış birde. Leonid Markelov älegä qädär dä Mari prezidentı bulıp tordı. Baştaraq çorında ul “LDPR”, yäğni mäğlüm Jirinovskiy partiäse äğzası ide, annarı “Berdäm Rusiä” partiäsenä küçte. İkençe urınnı Mixail Dolgov aldı. 20 protsent belän. Mäğlümat çığanaqları, anıñ biografiäsen, hönären qısqa itep kenä, notarius dip yazsalar da, älege şäxesneñ iminlek orğannarında eşlägänlege mäğlüm. Şunısı qızıq, Dolgov öçen mari milli xäräkäte tawış birergä çaqırdı. Alay ğına da tügel, Qazandağı Tatar ictimaği üzägeneñ Räşit Yäğfärov citäklägän qanatı da, mari milli xäräkätenä teläktäşlek belderep, möräcäğät belän çıqqan ide. Xalıqtan Dolgov öçen tawış birüne sorap. Tatar milli xäräkäteneñ ayırım wäkilläre Mari Eldäge qayber tatar rayonnarında bulıp, şulay uq, Dolgov öçen agitatsiä dä alıp bardılar. Bu nämzät öçen iñ küp tawış birgän töbäklärneñ berse Voljskiy rayonı. Tatarstan belän yänäşä genä urnaşqan, Yäşel Üzän rayonı kürşese. Bu rayonnnıñ yartı xalqı Tatarstanda, Qazanda eşläp yöri. Niçek kenä bulmasın, ike xalıqnın milli xäräkäte dä mari prezidentı itep kürergä telägän Mixail Dolgov ikençe urında qaldı. Öçençe urınnı Aleksey Korotkov biläde. Aña 10 protsent tiräse xalıq tawış birgän. Sergey Grigor'yev häm Aleksey Zayganov digän namzätlärne, saylawlar aldınnan, qayber küzätüçelär, gämäldäge prezident Markelov keşeläre dip beldergännär ide. Alarnıñ här ikese dä berär protsent qına tawışqa iä buldılar. Ä un protsentqa yaqın saylawlarda qatnaşuçı böten nämzätlärgä dä qarşı tawış birgän.
Mäğlümat çığanaqları, saylawlarda iñ aktiv qatnaşqan Bäräñge rayonı dip belderdelär. 62 protsent xalıq saylawlarğa kilgän. Ä bu tatarlar küpläp yäşägän rayon. Tatar rayonı dip äyterlek. Ä saylawçılar iñ az qatnaşqan töbäk Mari El başqalası Yoşqar Ola buldı.
Räfis Cämdixan