Yäkşämbe könne, 3 aprel'dä kürenekle şağirä,Ğ.Tuqay büläge iäse Gölşat Zäynaşeva belän xuşlaşu Ğ.Kamal teatrı foyesendä uzdı. Söyekle şağiräse belän xuşlaşırğa xalıq küp kilgän ide. Teatr orkestrı törle kompozitorlarnıñ Gölşat Zäynaşeva süzlärenä yazılğan köylären häm xalıq köylären uynap tordı. Anıñ “Kitmä, Sanduğaç!”, “Tuğan yağım Tatarstan”, “Yäş ğömer” kebek cırları tatar xalqınıñ häm Tatarstannıñ ber bilgese bulıp tora. Märxümäne soñğı yulğa ozatırğa Tatarstannıñ Prezident apparatı citäkçese Äğzam Ğöbäydullin, Ministrlar kabinetı, Däwlät Sovetı wäkilläre dä bar ide. Tatarstan Yazuçılar berlege räise Foat Ğalimullin xuşlaşu mizgelen açıp cibärde, häm anıñ sänğät ölkäsendäge xezmätläre turında söyläde. Premyer ministr urınbasarı wazifaların başqaruçı Zilä Wälieva iñ berençe çiratta Tatarstan prezidentı Mintimer Şäymievneñ matbuğatta çıqqan “Qayğınamä”sen anıñ Gölşat Zäynäşevağa zur xörmäten häm tuğannarınıñ, duslarınıñ häm ğomumän tatar xalqınıñ qayğısın urtaqlaşuın citkerde. Gölşat Zäynaşevanıñ küp kenä xalıq yaratıp cırlağan cırların äytep uzdı, häm “sänğät keşelärenä tieşle bäyä birelügä quanıp yäşi ide ul”,- dide. Gölşat Zäynaşeva Röstäm Yaxin, Aleksandr Klyüçarev kebek kompozitorlar belän icat itte. Dramaturg, yazuçı bularaq anıñ 30 dan artıq kitabı çıqtı.
Şağirä belän xuşlaşırğa kilgän yazuçılar - Şäwkät Ğaliev , Mädinä Malikova, Lena Şağircan, Tinçurin teatrı artistı Nail' Şäyxetdinov, cırçılar isemennän Zöhrä Säxäbieva, Minzälä rayonı apparat citäkçese Fäiz Vägızovlar da xuşlaşu süzlären äyttelär. Ğailäläre isemennän Gölşat Zäynaşevanıñ kiäwe, kürenekle xoquq eşleklese Rafael' Şakircanov, anı “Göläni, ide ul bezneñ”, - dide. Ul respublika citäkçelärenä häm kiñ cämäğätçelekkä räxmätlären belderde. Märxümäne Yaña bistä zıyaratında cirlädelär. Cenazanı İldus xäzrät Fäez uqıdı. Ğ.Kamal teatrında zıyarattan qaytqannarğa anıñ istälegenä bağışlap çäy östäle äzerlägännär ide. Gölşat Zäynaşevanıñ sänğät ölkäsendäge xezmätlären iskä alğanda anıñ yaqın icattaşları, dusları anıñ Sara Sadıyqova belän bik tığız icat itüläre turında söylädelär. Älfiä Afzalova anıñ cırların yaratıp başqaruı turında, İdmas Ütägänov anıñ turında kino töşerüläre turında istälekläre belän urtaqlaştı. Gölşat Zäynaşeva zur büläklärgä layıq bulğan ide. Ä inde büläklärneñ iñ zurısı, milli şağiräneñ keşelär küñelendä häykäl salıp, xalıq küñelendä qaluı.
Azatlıq radiosı Mälikä Basıyr, Qazan.