Yәkşämbe könne “İdel” lagerında tatar yäşläre könnäre tämamlandı. “İdel” yäşlär üzäge bu yañğırlı, salqınça könnärne cılıtıp, ruxi yaqtan bayıtu öçen bik küp eşlär başqardı. Soñğı könne lager'dä yäşlär saban tuyı ütkärelde, anda törle uyınnar häm yegetlärneñ tatarça köräşe bik qızu bardı. Bu yulı yäşlär sabantuyınıñ täkäsen Bawlı rayonı yegete İlüs yawladı. Şunda uq yäşlär könnärenä kilüçeläreneñ tatar kongressı wäkilläre belän oçraşuı buldı. Yäşlär üzläreneñ fikerlären, täqdimnären äyttelär. “İdel” lagerı administratsiäseneñ yäşlärgä tawış köçäytkeç apparatura birmäwen, tatar yäşläreneñ forumı citäkçeläreneñ lager'ğa kilep tä qaramawın tänqitlädelär. Ber atnağa yaqın däwam itkän yäşlär könnäre turında Azatlıqta tapşırular, bäxäslär inşa Alla kiläçäktä yañğırar.
Tatar yäşläre tormışındağı protsesslar kiñ cämäğätçelekneñ iğtibarına layıqlı. Ä xäzer Çallıdağı yäşlär tormışına da küz salıyq, çönki Qazandağı cıyında alar qatnaşmadı diärlek. Barı tik Mauzer Ğiniätullin, Räqip Äbdelmanov “İdel” lagerına alıp kilgän tatar yegete genä Çallı yäşläreneñ dönyada barlığın iskä töşerde.
Ğafiulla Ğazizğa söyli. Mizgel klubı yäşläre bıyıl Qazandağı İdel lagerına zurlap bara almadılar. Zamira Lariçewa äytüençä: “ yäşlär 5 könlek lagerğa 2000 sum aqçanı qibat sanağannar”. Şulay da Çallıdan Qazandağı İdel lagerına 7 keşelek delegatsiä şimbä –yäkşämbe könnärendä buldı. Alarnıñ küpçelege “Mizgel” lagerına yörüçe yäşlär ide.
Soñğı könnärdä respublikada bäla- qazalar da bulıp tora. Yoq maşinaları mıjlap torğan Qazanda 7 yäşlek qız- balanı kamaz maşinası taptağan, Ä Baltaç rayonında 79 yäşlek babay üz öyendä yanıp ülgän. Uzğan atna axırında Qazan şähäre administratsiäse binası qarşında tulay toraqlarda yäşäwçelär piketqa çıqtı. Alar üzläreneñ toraqqa xoquqların yaqlaw öçen iske şiğar'lär kütärgän ide. Düşämbe könne Azatlıqnıñ Qazan bülegenä Leninogorskiydan tıñlawçıbız Äsxät' Kärimov kilep kerde. Anıñ fikerläre häm täqdimnäre Baltaçtağı küptänge tıñlawçıbız Räfkät Zaripov çığışı kebek ük ğibrätle häm qızıqlı, ämma anı bez kiläse tapşıruğa qaldırıp torabız.
Rimzil Wäli.