Ğiraqnıñ maxsus mäxkämäseneñ yuğarı xakime Raed Juohi, matbuğat oçraşuında, elekke citäkçe Saddam Hösäingä 1982nçe yılda Bağdadtan tönyaqqa taba urnaşqan Ducail awılında şiği möselmannarın üterüdä berençe ğäyepläw belderelde, dip xäbär itte. Bu eştä şulay uq Saddamnıñ ügi abıysı, ul çaqtağı küzläw xezmäte başlığı Barazan İbrahim, elekke vise-prezident Taha Yassin Ramadan, häm Saddamnıñ Revolüsiä mäxkämäseneñ elekke baş xakime Awad Hamed al-Bandar tikşerelä. Ducail awılı aşa ütep barğanda Saddamğa höcüm itü tırışılığı bulğannan soñ awıldağı 140qa yaqın keşe yuq itelde. Bu - Saddamğa qarşı qaralğan 12 eşneñ berse genä. Ğiraqnıñ xoquq qanunnarına qarağanda, ğäyepläw belderelgän könnän – xökem eşe başlanğanğa qädär kimendä 45 kön ütergä tieş. Ğiraqta 3 intixar höcümendä bügen kimendä 10 keşe häläk buldı. Höcümnär Bağdadnıñ könyağında, könbatışında häm başqaladan 30 çaqrımda urnaşqan Mähmüdiä şähärendä buldı. Anda amerikan xärbi maşinalarına dip isäplängän höcüm tınıç xalıq utırğan avtobusta bulğan, kimendä 6 keşe häläk bulğan, 9zı yaralanğan.
Uzğan töndä Musayyib şähärendä intixarçı benzin tulğan yök maşinasın şartlattı. 90 keşe häläk buldı, 110nan artığı yaralandı.
Ğiraq parlamentı Musayyib şartlawı qorbannarın häm uzğan atnada häläk bulğan 20dän artıq balanı çärşämbe könne ber minutlıq tınlıq belän iskä alırğa çaqırdı.
