Bügen Başqortstan başqalası çitendäge Yaña Ufa Neft Eşkärtü berläşmäsendä yanğın çıqtı. Häläkät turında cirle waqıt belän köndezge 1 tulıp 21 minutta xäbär itelgän. 3 säğättän soñ yanğın sünderelgän. Ğädättäntış xällär ministrlığı räsmie Fänil Mäcitov, yanğın – torba iskerep tişelü säbäple çıqqan, dip belderde. Bezneñ Ufadağı xäbärçebez Mönir Wafin, şulay uq şartlaw bulu ixtimalı da tikşerelä, dip ireşterde. Ufa yanında çıqqan yanğında ber keşegä dä ziyan kilmägän.
