“Milli elita küzlegennän tatar ğasırı. 100 mäşhür tatar” digän kitapqa mäğlümat 4 yıl buyı tuplanğan. Şul däwerdä proyektnı äzerläwçelär barlığı 77 millättäşebez belän äñgämä qorğannar. Alar arasında Tatarstan, Rusiä, häm çit illärdä yäşäp tatar milläte yazmışına zur öleş kertkän säyäsätçelär, yazuçılar, tarixçılar, jurnalistlar da bar. Bu äñgämälär “Восточный экспресс” gäzitendäge “Tatar ğasırı” digän säxifädä basılıp kilde. Ul çaqta uq älege äñgämälär kübesendä qızıqsınu tudıra ide. Çönki millät öçen ğorurlıq tudıra torğan çit ildä tanılğan tatar ğalime, tatar yazuçısı fikere küplärgä tansıq buldı. Kitapta 14 avtornıñ yazması urın alğan.
Äñgämälärdä millättäşlärebez üz illärendä cirle xalıqnıñ tatarlarğa qaraşı belän tanıştıralar, millätne saqlaw häm üsterü öçen nindi eşlär başqarırğa kiräklege turında üz fikerlären citkerälär. Ällä niçä çaqrımnar ayırıp torsa da, kitapta millät yazmışı öçen ber ük borçular çağıla.
Proyekt eşlängän waqıt öçendä kitapqa kergän qayberlär şäxeslär inde wafat ta bulğannar. Şular arasında Äxmät Timer, Ayaz Gıyläcev, Marsel' Sälimcanov, äytep uzarğa kiräk.
Älege kitapta kübese tatarlar tarixı, ğasırlar däwamında alarnıñ yäşäyeşe turında fikerläre belän urtaqlaşa. Çit illärdä ğömer kiçergän Bötendönya tatarları Ligası prezidentı Ali Aqış, ğalim Vil Mirzayanov, Nadir Däwlät, jurnalist Färit Aği, biyuçe İrek Möxämmätov, yazuçı Rawil Boxaraev häm başqa küp kenä millättäşlärebez fikerläre ayıruça yaña tösmer birä bu basmağa.
Şulay uq kitapta tatarlar arasında 10 iñ mäşhür säyäsätçelär, din eşlekleläre, yazuçılar, muzıkantlar, tarixçılar, cämäğät eşlekleläre isemlege birelgän. Barlığı 99 keşe. Ä 100нче millättäşebezne kitapnı uqığan här keşe üze bilgelärgä tieş. Añlaşıla här keşe öçen mäşhür tatar iseme törle bulırğa mömkin. Kitapnı oyıştıruçılar älege isemlek obyektivraq bulsın öçen, äñgämä aluçılardan anketalar tutırttırğannar. Biredä töp maqsat kemneder yuğarıraq yäki tübänräk kürsätü tügel, ä tatarlar arasında dön'yakülämendä ni qädär bilgele şäxeslär barlığın çağıldıru dielgän. Älege isemlekkä kergän här millättäşebezneñ qısqaça biografiäse dä urın alğan kitapta. Şuña kürä bu kitap üzenä kürä ber beleşmälek rolen dä üti.
Kitapqa “Azatlıq” radiosınıñ da ike wäkile kertelgän. Färit İdelle häm Rimzil Wäli äñgämälären uqırğa bula.
Kitapnıñ bäyäse 250 sum tora.
Landış Xarrasova