Bügen fälestinle suğışçılar Misır belän Ğazzä sızığı çigendäge diwarnı öleşçä cimergännän soñ, mennärçä fälestinle Misırğa ağıldı. İzrail fälestin suğışçıları höcümnärenä qarşı töbäk çiklären uzğan atna yapqan ide. Fälestinlelär çiklärnen yabıluı säbäble ber atna buyına, yağulıq häm azıq tülek kebek kiräk yaraqlardan mäxrüm ide.
Bügen tañ atar aldınnañ, Ğazzädä bombalar şartladı.
Misır belän Ğazzäne ikegä ayırğan çik diwarı tar-mar buldı.
Fälestinle suğışçılar diwarnıñ 3tän ber öleşen cimerde. Fälestin xalqı işelgän diwar parçaları östennäñ çikneñ ikençe yağına kiçte. Xatınlı-irle balalar belän meñlägän xalıq Misırnıñ çik buyındağı Rafah şähärenä ağıldı. Xalıq ber atna buyına mäxrum qalğan kiräk yaraqların alır öçen kibetlärgä yul tottı.
İzrail xalıqara basımnar säbäble kiçä, çikläw qararın öleşçä ciñeläytep, yağulıq häm daru kertügä röxsät birgän ide. Läkin röxsät itelgän äyberlär xalıq ixtiyacın qanäğatländererlek tügel. Bügen xalıq Misır çigendäge kibetlärdän öylärenä tapqan qadär kiräk yaraqlarnı töyäp qayta.
“Kibetlärneñ kübese eşlämi ide şuña kiräkkän äyberlärneñ kübesen tabalmıy qaytabız” di äyberlären kütärep qaytqan fälestinle ber xatın. Min monda balama söt häm diabät awıruı bulğan tuganıma darular alır öçen kildem” di ul.
Kiçä polisiä Misır çigen uzarğa telägän yözlärçä xatın-qıznı, hawağa ut açıp, su belän quğan ide. Çualış waqıtında 60 xatın-qız yaralandı. Bügen isä şaxitlar süzenä qarağanda, misır polisiäse xalıqnın çikne uzuın totqarlamağan, alarnıñ ütüen qırıyda basıp küzätep torğan.
Ğazzä şähärlärennäñ kilgän roketa höcümnärenä qarşı, İzrail töbäkne üz eçendä çiklägän ide. Şuña, İzrail açmaşqa quşsa da fälestin suğışçıları tarafınnan Misırğa çikne açarga digän basımnar artqan ide.
İzrailnen töbäkne üz eçendä yabu qararına, xalıqara cämäğatçelek, monıñ humanitar krizgä etärä alu ixtimali turında kisätep bu qararğa tänqit belderä.
Yewropa berlege İzrailneñ Ğazzäne çikläw ğamälen, ber yarım million keşene bergä cäzalaw bularaq taswirlägän ide.
İzrail isä yaña höcümnär bulaçağına borçılu belderä.
Bu xaqta Möselman häm Ğaräp illäre taläbe belän İzrail räsmiläre belän fälestinlelär arasında söyläşülär bulsa da ällä ni näticä bulmadı. Cıyılışta insani yärdämnärne kertergä röxsät itü eşe qaralsa da, näticägä kilenmäde.
İzrail tışqı eşlär ministrı süzçese Arye Mekel bolay dide:
Ägär dä çığış yulı açılğan ikän tizdän kereş yağı da açılaçaq. Bu borçuğa sala çönki suğışçılar bu çikne keşe häm qoral yaraqlar taşu öçen dä qullana başlayaçaq. Bu qurqıta.
Mekel, İzrailneñ Misır cirendä çik buyında xärbiye bulmaw säbäble, anda tärtip urnaştıru Misır ğaskäriye cäwaplılığına qala dip äytte.
Humanitar yärdämnär, yäğni azıq-tölek, köndälek kiräk yaraqlar çiklängän şartlarda Ğazzägä kertergä röxsät iteläçägen beldergän İzrail tışqı eşlär ministrlığı süzçese, çikläwlärne ğamäldän çığaru höcümnärneñ bulıp bulmawına bäyle dide.