Accessibility links

якшәмбе, 11 декабрь 2016, Казан вакыты 03:26

Казанда атомга каршы пикет үтте


11 март Казанда Татарстан АЭСы төзелешен башлатуга каршы, Казандагы "Радон" радиоактив калдыклар саклагычын яптыру өчен, авыл-хуҗалыгы продукциясен гамма нурландыру технологиясен куллануга каршы пикет узды.

Бауман урамында оештырылган бу чара 2011 елның 11 мартында Япониянең Фукусима-1 АЭСында булган авариянең дүрт еллыгына багышланды.

Пикетта "Чернобыль, Фукусима, чираттагысы?", "Татарстанда Чернобыль булмасын", "Тат.АЭС - татар халкының агулы кабере" дигән һәм башка шигарләр күтәрелде.

Чернобыль авариясен бетерү эшләрендә катнашкан Әзһәр Вәлиуллин бу пикетка Татарстан халкының киләчәктә гарип булып яшәмәве өчен чыгуы турында белдерде.

"Атом станциясе бик зыянлы. Чернобыльдәге фаҗигане алыйк. Анда күпме кеше үлде, күпмесе гарип калды. Япониядә технология алга киткән булса да Фукусима АЭСында нинди зур авария килеп чыкты. Җир астында нәрсә булачагын беребез дә белми. Шуңа күрә Татарстанга атом станциясе кирәкми", дип үз фикерләрен җиткерде ул.

Пикетта "Тат.АЭС - татар халкының агулы кабере" дигән шигар күтәреп чыккан ТИҮ рәисе Фәрит Зәкиев Татарстанны һәм Башкортостанны агулап бетерергә җыеналар дип әйтте.

"Бу эш - бер диверсия. Татарстанның Кама Аланы шәһәрендә төзергә җыенылган АЭСыннан 60 метр өстәрәк кенә Түбән Кама гидроэлектр урнашкан. Ягъни сусаклагыч. Менә шул сусаклагычка берәр нәрсә булса, бу - ахырзаман дигән сүз. Бу Татарстан гына түгел, Русия дә бетте дигән сүз. Чөнки су астында калган атом станциясен берничек тә сүндереп булмый. Без бу хакта күпме генә әйтеп килсәк тә, моңа карамастан һаман да бу АЭСны төзергә телиләр.

Кама Аланында 2030 елга кадәр АЭС төзү - Русиянең стратегик планына кергән инде. Аның төзелеше шушы елларда башланырга тиеш. Чөнки 2013 елда безнең дивана хакимият бу төзелешкә ризалык бирде", дип белдерде ул.

"Татарстан атомга каршы" оешмасы оештырган пикетка Татар иҗтимагый үзәге һәм "Русия коммунистлары" фиркасенең Татарстан бүлеге теләктәшлек күрсәтте.

фикерләрне күрсәт

XS
SM
MD
LG