Яңгыр астында узган сайлау концертына Рөстәм Миңнеханов килмәде
"Казан-Арена"да туктаусыз яңгыр астында "Мин сайладым!" тасмасы белән сайлау концертын караучылар Татарстан президентын күрә алмады. Аның килүе көтелсә дә, ул килмәде. Тамашачыны Миңнеханов урынына хөкүмәт башлыгы Илдар Халиков сәламләде, сайлау көне белән котлап "бик зур рәхмәт сезгә!" диде.
Видеойомгак: Татарстандагы сайлауларда хәрәмләшүләр
Татарстанда 18 сентябрьдә узган сайлауларда шактый гына канун бозу очраклары турында хәбәр ителде. Азатлык видеосында - әлеге сайлауларның һәм хәрәмләшүләрнең кайбер мизгелләрен чагындырган көн йомгагы.
Татарстан Үзәк сайлау комиссиясенең мәгълүмат үзәгендә Татарстан буенча беренче экзит-пол нәтиҗәләре игълан ителде. 5 меңнән артык кешене сораштыру нәтиҗәләре шундый: "Бердәм Русия" 79,6 процент җыйган, КПРФ - 6,3 процент. ЛДПР 4,1 процент җыеп, "Гадел Русия" өчен 4 процент кеше тавыш биргән. Сораштырулар нәтиҗәләренә күрә калган фиркаләр бер процент та җыя алмаган.
Бермандатлы бүлгеләрдә дә Бердәм Русия шактый алда бара диелә. Идел буе районында 51,5 процент белән Фатих Сибагатуллин җиңә, икенче урында коммунист Виктор Пешков (13,2%), Мәскәү районында Бердәм Русиядән Илдар Гыйлметдинов (46,1%), икенчедә коммунист Хафиз Миргалимов (15,9%) Түбән Кама сайлау бүлгесендә Бердәм Русиядән Айрат Хәйруллин (51,8%) КПРФтан Алберт Яһүдин (13,8%), Чаллыда Әлфия Когогина (БР, 43,6%), Татьяна Гурьева (16%), Үзәк сайлау бүлгесендә Иршат Минкин (БР, 44,4%), Артем Прокофьев (КПРФ, 13,1%), Әлмәттә Ринат Хәеров (БР, 53%), Александр Агафонов (КПРФ, 14,1%).
ФОМ (Иҗтимагый фикер фонды) да сораштырулар нәтиҗәсен игълан итте
Аларның экзит-пол нәтиҗәләренә күрә "Бердәм Русия" 44,5% тавыш җыя, КПРФ — 16,3%, ЛДПР — 14,3%, "Гадел Русия" — 7,6%, "Яблоко" — 2,6%. ФОМ мәгълүматларына күрә башка фиркаләр 1%тан азрак тавыш җыйган.
Исегезгә төшерәбез, ВЦИОМ һәм ФОМ китергән нәтиҗәләр - иҗтимагый фикер сораштырулары гына, алар соңгы нәтиҗәләрдән аерылырга мөмкин.
ВЦИОМ экзит-пол (сораштыру) нәтиҗәләрен игълан итте
ВЦИОМ мәгълүматларына күрә (экзит-пол нәтиҗәләре) Дәүләт Думасына 4 фирка уза. "Бердәм Русия" 44,5% тавыш җыя, ЛДПР — 15,3%, КПРФ — 14,9%, "Гадел Русия" — 8,1%. Калган фиркаләр 5%лы киртәне уза алмаган диелә.
Экзит-пол нәтиҗәләренә күрә, "Яблоко" 3,5% тавыш җыйган, "Русия комунистлары" —2,6%, "Родина" — 2,3%, «Пенсионерлар фиркасе» — 2%, "Үсеш фиркасе" — 1,8%, ПАРНАС — 1,2%.
Көтелмәгән хәбәр: "Казан Арена" стадионына Татарстан президенты Рөстәм Миңнеханов килмәячәк. Аның урынына премьер-министр Илдар Халиков һәм Дәүләт Шурасы рәисе Фәрит Мөхәммәтшин булачак. Азатлык иртүк үк, тавыш биргәндә Рөстәм Миңнехановның начар кәефтә булуын хәбәр иткән иде. Президентның матбугат хезмәте аның тамагы авырта дип әйткән.
Русиянең күпчелек төбәкләрендә тавыш бирү тәмамланган. Сайлау бүлекләре тавышлар санауга күчә. Казан вакыты белән кичке тугызда, Калининград өлкәсендә сайлау тәмамлану белән, беренче экзит-пол нәтиҗәләре игълан ителәчәк.
"Яблоко" фиркасенең Татарстан бүлеге җитәкчесе Руслан Зиннәтулин сайлауга бәя биргәндә, "сайлауның гадел үтмәвен көткән идек" диде. Ул тавыш бирергә килүчеләрнең саны арттырылып күрсәтелә, шуңа комиссияләр бюллетеньнәр ыргытырга әзерләнәләр дип көтәбез, диде. "Кайбер сайлау бүлекләрендә камералар бөтенләй эшләми яки сайлау тартмаларын күрсәтми. 413 сайлау бүлегендә тавыш бирергә килүчеләр буенча күзәтүчеләр биргән сан һәм коммисия биргән рәсми мәгълүматлар арасында аерма якынча 100 кеше иде. "Голос" вәкиле шикаятеннән соң бүлектәге комиссия рәисе ялгышканын таныды, саннарны үзәгәртте", дип сөйләде Азатлыкка Зиннәтуллин.
"ПАРНАС вәкилләрен 3 сайлау бүлегенә, гомумән, кертәделәр. 321 сайлау бүлегендә "Яблоко"дан Үзәк сайлау комиссиясе әгъзасы булган Александр Ильин тавыш бирүгә кагылышлы бернинди документ күрсәтмәгәннәр, шикаятен кабул итмәгәннәр. 41 һәм башка сайлау урыннарында сайлауга ничә кеше килү турындагы саннарны яшерделәр. Сайлау көненнән соң булган видеоларны алып, һәр сайлау бүлегенә ничә кеше килгәнен санаячакбыз һәм рәсми саннар белән чагыштырачакбыз", диде Руслан Зиннәтуллин.
"Парнас" вәкиле Марсель Шәмсетдинов та тавыш бирүчеләр санына шикләнеп каравын белдерде. Азатлык хәбәрчесе белән сөйләшүдә ул административ басымга зарланды, үзе сөйләшкән сайлаучылар, дәүләт оешмалары хезмәткәрләре, эшкә сайлауга бару турында гына түгел, "Бердәм Русия"гә куйган тамга белән бюллетень рәсемен дә җибәрергә кушалар дип сөйлиләр, диде. Бу сайлауларның канунилыгын Шәмсетдинов шик астына куя.