Accessibility links

якшәмбе, 4 декабрь 2016, Казан вакыты 23:21

Swerdlovski ölkäsendä qorban bäyräme


Bu könnärdä Swerdlovski ölkäse şähärlärendä häm awıllarında möselman xalqı izge qorban bäyrämen bik kürkäm itep bilgeläp ütä. Yıqäterinburg, Yuğarı Pışma, Perwourälski kebek zur mäçetle şähärlärdä, bäyräm namazın, xalıq küp bulıp, urın citmägänlektän, ikeşär-öçär qabat uzdırdılar. Şunısı quanıçlı, namaz uquçılar arasında aq saqallı babaylar yanında örlektäy yäş yegetlärne dä, dürt-biş yäşlek sabıylarnı da kürergä bula ide.

Balalarnıñ berniçäse belän tanışıp ta aldıq. Tuğız yäşlek Xäsän biş yäşennän birle mäçetkä yöri, biş waqıt namazın qaldırmıy. Qatnaş ğäilädä tuğan bu bala räsmi qäğäzlär buyınça Yığor isemle bulsa da, üzenä Xäsän dip däşkänne yarata. Xäsänneñ ätise, Swerdlovski ölkäsendä bik küp mäçetlär tözep tanılğan metsenat, Yıqäterinburg şähärendä eşläp kilüçe Milli Media-Xoldingnı ğämälgä quyuçılarnıñ berse Rinat Äskärov balaların şulay iman ruxında tärbiälärgä tırışa. Bäyräm namazına kilgän iñ keçkenä sabıylarnıñ berse, dürt yäşlek Röstäm mäçetkä äle bäyräm waqıtlarında ğına yöri. Anıñ ätise, kürenekle tatar eşmäkäre, Milli media-xoldingnı ğämälgä quyuçılarnıñ tağın berse Rinat Sadriev, balalarğa ata-baba qaldırğan ruxi mirasnı citkerüne izge burıçı itep sanawın belderde.

Balalarnıñ dingä tartıluı bik quanıçlı xäl. Bigräk tä Perwourälski şähäre mäçetendä bik küp balalarnı kürergä bula. Bez bu turıda mäçetneñ imamı Ğabderäxim xäzrät belän äñgämä qorıp aldıq. “Soñğı yıllarda islam dine belän qızıqsınu, dingä qızığu tendensiäse bar, - di Ğabderäxim xäzrät, - Balalar çınlap ta bezneñ mäçetkä bik teläp yörilär. Mäçettä alarnı yaxşı qarşı alalar, äybät itep söyläşälär. Bik bäläkäylärenä äbi-säbi büläklär dä birgäli. Qaywaqıt alar belän bergä cıyılıp däreslär uzdırabız, alarnıñ sorawlarına cawaplar biräbez. Alar belän härwaqıt urtaq tel tababız”.

Swerdlovski ölkäse möselmannarınıñ Qazıyat idaräse balalarnı ğına tügel, bar xalıqnı dingä kiterü buyınça zur eşlär başqara. İdaräneñ üzäge bulğan Perwourälski mäçetenä xalıq teläp, qızıqsınıp yöri. Bäyräm namazına cıyılğan keşelär üz toyğıları belän bik teläp urtaqlaştılar, barça möselmannarğa bäyräm qotlawları yulladılar.

Qorban bäyräme biredä, härqaydağıça, öç kön buyı däwam itä. Möselmannar bergäläşep äzerlägän mul tabınnarda qorban aşınnan awız itälär, izge niätlär belän il-köngä tınıçlıq teläp doğa qılalar. Doğalar qabul bulsın.

XS
SM
MD
LG