Accessibility links

дүшәмбе, 5 декабрь 2016, Казан вакыты 21:44

Tatarlar.ru üzeneñ 5 yıllığın Qazanda bäyräm itte


Tatarstanda yubileylar yış ütä. Bilgele şäxeslär tügäräk dataların bilgeläp ütä, törle oyışmalar tuğan könnären zurlap uzdıra. Ä İnternettağı säxifälärneñ yubiley bäyrämnäre, äle moña qädär, bilgeläp ütelgäne yuq ide. Tatarlar.ru partalı xezmätkärläre üzeneñ 5 yıllığın Qazanda uzdırırğa buldı. Tantanalı kiçä Tatar kongressı binasında, sayt qullanuçıları, dusları qatnaşlığında ütte. www.tatarlar.ru digän adresnı internet belän azmı küpme tanış bulğan tatar zıyalıları belä bulıp çıqtı. İnternetta eşläwçelär cıyılışlarında ğädättä zamança texnologiäne belüçe yäşlär genä cıyıla ide, bu yulı isä, ölkän buyın yazuçılar da, internettan yıraq torğan yawlıqlı äbilär dä bar ide. Yazuçı häm deputat Tufan Miñnullin, milli xäräkät wäkile Tälğät Äxmädişin, «Aq Qalfaq» oyışması citäkçese Kämäriä Xämidullina häm internet sayt xucaları, qızıqsınuçı yäşlär dä buldı anda. Tatarlar.ru mäğlümatqa bay, köndä yañarıp tora torğan, dönya tatarları turında operativ mäğlümat citkerä torğan internet säxifä. Törle ölkä keşelären ul tağın «yıl tatarı»bäygesen ütkärüe belän dä üz tiräsendä tuplıy aldı.

Älege yubiley kiçäsendä, Yıl tatarları bäygesendä, törle yıllarda ciñgän keşelär cıyılğan ide. Kiçä doğadan başlanıp kitte. Tatarlar.ru säxifäseneñ xucası Timur Söläymanov, ul alıp bara torğan proyektnıñ keçkenä yubiley bäyrämen urtaqlaşırğa kilgän qunaqlarğa ixlas räxmätlären belderde. Ğädäti yubiley kiçälärennän ayırmalı räweştä, yubilyarğa büläklär yawdırmadılar biredä, säxifä isememnän üzennän qunaqlarğa diplomnar birelde. Tatar kongressında uzğan cıyılışta, iñ berençe bulıp, 2005 yıl tatarları büläklände. 2005 yılda iñ zur eş eşlägän tatar xatın qızı – jurnalist Gamirä Däwlätşina cämäğätçelek aldına çıqtı. Çallıdağı milli xäräkät wäkile Tälğät Äxmädişinğa da diplom birelde. Ul 2005 yıl tatarı bulğan ide. Tatarlar.ru säxifäsendä yış çığış yasağan häm 2004 yılda internet tawış birüdä ciñgän Fändäs Safiullinğa da diplom tapşırıldı. Büläkne tapşırğan xoquqçı Nazım Safin, üze dä internettan yıraq keşe tügel, tanışlarnıñ saytlarına kerep yöri ikän. Fändäs Safiullin, räxmätlären belderep, internettan, kompyuterdan başqa yäşäw awır bula başlawın äytte. Dramaturg häm deputat Tufan Miñnullin kiçädä, internet häm kompyuterlarnı yaratmawın belderde. Ämma, zamanası şul bulğaç, faydalı närsä ikänen tanıdı. Tatarlar.ru säxifäseneñ finans çığımnarı tulısı belän baş möxärrir cilkäsendä yata, yubiley bäyräme dä entuziastlar tırışlığı belän ütte. Ämma waqiğa zur yañğıraş aldı. Timur Söläymanov 2nçe tatar gimnaziäsendä uquçılar belän oçraşıp, master- klass birgän. «Üzebez» xäräkäte uzdırğan press-klub söyläşüendä dä qatnaşqan. Televideniedä, radioda çığış yasağan.

Kongress binasında ütkän tantanalı cıyılışqa da saytnıñ dusları, artistlar, cırçılar kilde. Bäyräm kiçäse, räsmi öleştän soñ, yäş cırçılar, yaña muzıkal törkemnär qatnaşlığında bulğan konsert belän tämamlandı.

Bikä Timerova.

XS
SM
MD
LG