Rusiä säyäsätçeläreneñ faşizmğa qarşı pakt qabul itelüläre, faşistik häm Rusiä bötenlegenä yanawçı oyışmalar rätenä Başqortstandağı häm Tatarstandağı qayber milli oyışmalarnı kertüläre turında xäbär itkän idek. «Berdäm Rusiä» firqäse wäkile V.Volodninnıñ, matbuğatta basılğan äñgämäläre dä kiñ cämäğätçelekkä bilgele. Anda faşistik oyışmalar rätendä Tatarstandağı «İttifaq» firqäse telgä alına. Başqortstannan ayırmalı bularaq, Tatarstanda bu belderülärgä, därräw qubıp qarşılıq kürsätüçelär bulmağan ide. «İttifaq»tan da belderülär kilmäde. İnde bu könnärdä, Çallıdağı milli xäräkät wäkilläre mäsälägä qaraşın beldererä buldı. Düşämbe könne «Azatlıq» mäğlümat-analizlaw üzägendä cämäğätçelekkä möräcäğät qabul itelde. Ülege üzäk wäkile, Milli Mäcles deputatı Faiq Taciev möräcäğätneñ eçtälege belän tanıştırdı. Anıñ fikerençä, «İttifaq» barı tik tigez xoquqlıqnı taläp itä, tatarlarnıñ dinen, milläten saqlap qaluğa bulğan omtılışı tabiği, millätçelekne faşizm belän tiñläw kileşmi. «Milli Yort» ictimaği oyışması räise Rauf Ğizatullin da, bu belderülär artında mäkerle säyäsät kürä. «Bu sotsial ğädelsezlek problemalarınnan iğtibarnı çitkä yünältü, üz milli yözen saqlarğa tırışuçı qıyırsıtılğan xalıqlarnı säyäsi butalçıqlıqqa kertep, milli köräşneñ mäğnäsen yuğaltu öçen eşlänä», digän fikerdä tora Rauf Ğizatullin. Mäğlümat-analizlaw üzägeneñ möräcäğätendä, millätçelekne faşizmğa tiñläw adımı, tatar milli xäräkätenä qarşı oyıştırılğan provokatsiä itep bäyäli, dip äytelä.
Ğafiulla Ğaziz.
