Accessibility links

якшәмбе, 4 декабрь 2016, Казан вакыты 09:22

İlsur Metşin Qazannıñ yaña başlığı bulırmı?


12 martta, Tatarstanda 94 okrugta saylawlar ütte. Qazannan arı, Arça, Baltaç, Ätnä, Aqtanış barlığı 18 rayonda yañadan tawış birülär oyıştırıldı. Qayber saylawlarda, deputat bulıp saylanırğa telägän nämzätlärneñ xätta köndäşläre dä bulmadı, ä Qazanda ber urın öçen 4-5 keşe köräşte. Üzäk Saylaw komissiäse räise urınbasarı Minfaiq Wafinnıñ äytüenä qarağanda, bar respublika buylap saylanğan deputatnıñ 49 «Berdäm Rusiä» firqäsennän , «Tatarstan -Yaña ğasır» xäräkätennän 4 keşe, qalğan 41 deputat – üz üzen kürsätkän nämzätlär ide. Belkem soñğılar arasında kommunistlar da, başqa firqä wäkilläre dä bulğandır, dide üzäk saylaw komissiäse räise urınbasarı. Minfaiq äfände Wafinnıñ äytüenä qarağanda, 94 deputat zamanında bu wazifadan baş tartqan bulğan. Mäsälän andıy keşelärneñ sanı Arçada - 25, Batlaçta - 18, Ätnädä -14, Aqtanışta -9, qalğan rayonnarda - 2, 3 keşe. 16 oktäberdä saylanğan keşelärneñ qaysıberläre başqa cirgä, eşkä küçep kitkän bulsa, qalğannarı, eşlägän urınnarın qaldırırğa telämiçä, deputat kenägäsen başqalarğa birergä bulğan. Däwlät eşendä eşläwçelär mäsälän, ber uq waqıtta deputat bula almıylar. Şulay itep, munisipal xakimiättä eşlärgä teläweçlär citmäskä mömkin, digän süzlär küpmeder däräcädä çınğa aşa başladı. İnde yaña saylanğannardan deputatlıqtan baş tartuçılar bulsa, buşap qalğan urınnarğa saylawlar tağın 4 yıl däwamında ütkärergä mömkin. Qazanda, törle säbäplär belän 3 deputat urını buşağan ide.

16 oktäberdä deputat bulıp saylanğan Kamil İsxqov, xalıq wäkile bulıp ozaq yöri almadı, dekaberdä wazifalarınnan baş tartırğa mäcbür buldı. Kamil İsxaqov urınına kilgän, İlsur Metşin, näq şuşı uq Wahapov okrugında deputat bulırğa teläde. Safiullin häm Qaban artı okruglarındağı deputatlar berse başqa eşkä küçü säbäple, ikençese militsiädäge eş urının qaldırırğa telämiçä deputatlıqtan baş tartqan ide. Şulay itep, buşağan urınğa İlsur Metşinnıñ elekke xezmättäşe, Tübän Kamadan kilgän Marat Moratov saylawçılar küñelen yawlarğa, dip saylaw köräşendä qatnaştı. 3nçe deputat kenägäse öçen, «Näfis Käsmetiks» kebek bik uñışlı eşläwçe , bik zur şirkätneñ citäkçese Dmitriy Xaybullinda yarışta qatnaştı.

Härberseneñ 4-5 köndäşe bar ide. 12 martta, säyäsät belgeçläreneñ farazları çınğa aştı. Wahapov okruğında İlsur Metşin ciñde (76% ), Marat Muratov öçen saylawçılarnı 60 % tawışların birgän, Dmitriy Xaybullinnı 65% saylawçı deputat itep kürergä teläde. Qazan şähär saylaw komissiäse särkätibe, «Azatlıq» sorawına saylawlarnıñ ütä dä tınıç häm ğädel şartlarda ütüen xäbär itte. Anıñ äytüenä qarağanda saylaw komissiäsenä, 12nçe mart könne ber nindi qanun bozular turında xäbärlär kilmägän, şikäyätlär kilmägän.

Saylawlardan soñ, tormış niçek däwam itäçäk, xakimittä nindi üzgäreşlär bulaçaq, digän soraw tudı. Deputat bulıp saylanğan Marat Muratov, «Tatmedia» agentlığı belän idärä itüne häm deputat bulunı bergä alıp bara ala. Çönki anıñ töp eş urını, däwlät xezmäte, dip sanalmıy ikän. Dmitriy Xaybullin, biznes şirkäte citäkçese, ul da deputat bulır öçen eşennän kitärgä tieş tügel. Ä İlsur Metşin belän xällär başqa. Ul başqarma komitet räise urınnan baş tartırğa cıyına, anıñ wazifaların başqaruçı itep, urınbasarı qalıp tora. Qazan munisipal berämlege başqarma komitetı başlığı urınına yañadan bäyge iğlan itelä. Bu mäs’älälär 17 mart könne bulası Qazan Şähär Duması utırışınıñ kön tärtibenä çığarılğan. 4çe mäs’älä itep, Qazan şähäre munisapal berämlege başlığın saylaw mäsäläse tora. Şuşı urınğa İlsur Metşinnıñ saylanuında şiklänüçelär äz. Şulay itep, 17 mart cıyılışınnan soñ, İlsur Metşin Tatarstan başqalası belän yaña wazifada idärä itä başlıy.

Bikä Timerova.

XS
SM
MD
LG