Accessibility links

дүшәмбе, 5 декабрь 2016, Казан вакыты 07:37

Açıq mikrofon: Tatarstan tawarların qullanalarmı?


Tatarstanda “Ramstor”, “Magnit”, “Paterson”, “Perekrestok”, “Bäxetle” kebek zur kompaniälär üzebezdä citeşterelgän produktsiä belän säwdä itärgä bik aşqınıp tormıy. Bu xaqta respublikanıñ ministrlar kabinetında uzğan komissiä utırışında äytelde. Zur kompaniälär Tatarstanda citeşterelgän ipi, söt, qaymaq, şikär kebek köndälek azıq-tölek satu belän genä çiklänep, başqa tovarlarnı çittän kiterä. Säwdä çeltärläre wäkilläre Tatarstanda citeşterelgän tovarlarnıñ Yevropa standartları taläplärenä turı kilmäwenä häm citeşterüçelärneñ reklama kompaniäse belän bik az şöğellänüenä däğwä belderä. Ä Tatarstannıñ tovar citeşterüçeläreneñ däwaları isä alarnıqınnan da kübräk buldı. Alarnı säwdä çeltärläre tarafınnan bilgelänä torğan “bonus”, “büläkläw”, “taşlamalar” hiç tä qänäğätländermi.

Tatarstan xalqı respublikada citeşterelgän tovarlardan qänäğätme soñ? Alalarmı Tatarstannıñ tovarın? Bügenge açıq mikrofon şuşı xaqta:

--Tatarstanda citeşterelgän tovarlarnı alabız älbättä! Produktlardan söt, kolbasalarnı alıp toram. Ğomumän, üzebezdä citeşterelgän produktlarnı kübräk yaratam!

-Bazarda närsä satalar, şunı alabız inde. Kibetlärdän alıp bulmıy, anda bik qimmät! Bazardan söt, it, bäräñgelärne alam. Pensionernıñ tağın närsä alırğa mömkinlege bar inde? Bik az bit bezneñ pensiälär, ä fatirğa tüläwlär qimmät.. Menä şulay.

-Söt kebek produktlarnı alam min. Ä Tatarstanda tağın närsä citeşterelä? Min belmim.

-İt, ikmäk, on, konfet, peçenye satıp alam. Qazanda tegelgän äyberlärne dä alam. Qayçaqta ğına bazarğa baram. Zur-zur kibetlärgä kermim dä, anda arzan dip äytsälär dä, ğadi xalıq öçen tügel alar, böten närsä bik qimmät!

-Söt, tort, üzebezdä citeşterelgän başqa barlıq produktlarnı da alam. Şulay uq kiemne dä. Menä ayağımdağı botinkalar da “Spartak”nıqı. Şunı äytäse kilä, bezdägelär sıyfatlı bula bit anıñ. Ber-ike kön kideñ dä, taşladıñ tügel. Alar sıyfatlı bula. Produktlarnı kübräk bazarda satuçı tatar apalarınnan alırğa tırışam.

Al'bina Zäynulla

XS
SM
MD
LG