Mitingnı “Berdäm Rusiä” firqäseneñ Tatarstan bülege häm respublikanıñ profsoyuz hönäri berlege başlap cibärde. Älege ike oyışma tarafınnan uzdırılğan miting milli-mädäni üzäk qarşında uzdı. Xalıq aldında Tatarstan Däwlät Şurası räise urınbasarı Rimma Ratnikova, respublikanıñ profsoyuzlar federatsiäse citäkçese Tat'yana Vodop'yanova “Berdäm Rusiä” säyäsi firqäseneñ Tatarstandağı başqarma komitet räise Viktor Budarin çığış yasadı. Miting “Xezmät iäsenä - layıqlı xezmät xaqı!” digän şiğar astında uzdı. Mitingtan soñ 3 meñnän artıq keşe tantanalı yöreştä qatnaştı. Profsoyuzlar Tatarstan eşçeläreneñ tübän xezmät xaqı aluğa, ä bigräk tä byudjet tarmağındağılarnıñ xäle bik qatlawlı buluğa borçılu belderde. Respublikanıñ profsoyuzlar federatsiäse citäkçese Tat'yana Vodop'yanova:
Här öçençe tabip, uqıtuçı, mädäniät xezmätkäre bügen fäqir yäşi. Baylar häm xäyerçelär arasındağı ayırma tağın da zuraya ğına bara. Ğomumän respublika xalqınıñ xezmät xaqı bik tübän. Ä şul uq waqıtta kommunal' xezmätlär häm ğomumän xaqlar ğälämät zur tizlek belän öskä ürmäli. Bezneñ pensionerlar bügengeçä yäşärgä tieş tügel ide. Alarnı mondıy tormışta yäşätü - kimsetü digän süz. Balalarıbız ğädel räweştä uqırğa kerä almıy. Sälätle bulsalar da, mömkinlege bulmasa uqudan mäxrüm qala. Bezneñ maqsatlar açıq: Layıqlı yäşärgä telibez! Xalıqqa layıqlı xezmät xaqı häm pensiä kiräk! Keşelärebezneñ sälämätlegen saqlawğa, xezmäte, mäğärife, estetik häm ğomumän üseşenä xoquqı saqlanırğa iteş!Ä şul uq waqıtta İrek mäydanında kommunistlar cıyıldı. Alar ğädättägeçä 1май mitingın Lenin häykäle qarşında uzdırdı. Kommunistlar cıyılışında barlığı 300läp keşe qatnaştı. Biredä Nigezdä çal çäçle xalıq aldında kommunistlar firqäseneñ Tatarstan bülege wäkilläre Näsimä Stolyarova, Robert Sadıyqov häm başqalar çığış yasadı. Biredä miting bik qızu bardı, patriotik ruxta, notıqlar, şiğar'lär belän. Çığış yasawçılar bügenge citäkçelärneñ säyäsätenä rizasızlıq belderde. Näsimä Stolyarova:
Kommunistlarnı töp şiğare tartıp alu häm bülü buluında ğayıplilär. Ämma bit 18nçe yılda xalıq üz qulları belän eşläp alğannı tartıp aldı. Ä bügenge xakimiätne alıyq. Demokratlar da bik küp närsäne tartıp aldı. Alar xalıq qulları belän eşlängänne alıp, üz-ara büleşte, xalıqqa isä çittä qaldı. Bezneñ xakimiät xalıqqa qarşı eşli. Alar amerikanlılarğa oxşarğa tırışıp, bez 50 million qalsın dip teli. Ämma bez monı buldırmayaçaqbız!Mitingtan soñ anda qatnaşuçılar 1 may mäydanına kilep, Musa Cälil häykälenä çäçäklär saldı. Şunıñ belän Tatarstandağı 1 may mitingı tämamlandı.
Al'bina Zäynulla
