Accessibility links

җомга, 9 декабрь 2016, Казан вакыты 20:18

Ästerxan Qazannan bäyräm itärgä öyränä


Qazanğa qunaqlar, räsmi delegatsiälär bik yış kilep tora. Menä bu könnärdä dä Tatarstanda Ästerxan ölkäse xakimiäte wäkilläreneñ räsmi säfäre bara. Ästerxan delegatsiäseneñ Tatarstanğa räsmi säfäre 3 mayda başlanıp kitte. Bu yulı Qazanğa şaqtıy däräcäle törkem kilde. Ölkäneñ vitse-gubernatorı, xökümät başlığı Konstantin Markelov citäklägän delegatsiädä Ästerxan şähäreneñ başlığı Sergey Bajenov, ölkä xökümäte wäkilläre, matbuğat üzäge citäkçese, ölkäneñ qayber rayonnarınıñ başlıqları bar ide. Qunaqlarnıñ Qazanğa kilüläreneñ töp maqsatları – ike töbäk arasında xezmättäşlekne arttıru turında kileşü. Ästerxan ölkäse belän Tatarstan inde küptän ikeyaqlı aralaşunı üsterä. Xezmättäşlek turında berençe kileşü inde 1996 yılda uq imzalanğan bulğan. Läkin ike töbäkne dä mädäni, sotsial’ häm, bigräk tä, iqtisadi xezmättäşlek qänäğätländermi, dip belderde respublika premyer-ministrı Röstäm Miñnexanov. Bu xaqta ul 4 mayda delegatsiä wäkilläre belän bulğan oçraşuda äytte. Şuşı nisbättän ike töbäk arasında iqtisadi, säwdä, fänni, mädäni xezmättäşlek turında yaña kileşü dä buldırıldı, dip xäbär itä Tatar-inform agentlığı. Kileşüne Röstäm Miñnexanov häm Konstantin Markelov imzaladılar. Şuşı imzalaw çarasında Röstäm Miñnexanov, ike töbäkkä bergäläp federal’ üzäk aldında nığraq torırğa, töbäklär faydasına qayber mäs’älälärne xäl itärgä ciñelräk bulaçaq, dip tä äytte.

Ästerxan wäkilläre Tatarstannıñ İdeyä texnoparkında da buldılar. Monda alar respublikanıñ iqtisadi xäle, sänäğät mömkinlekläre belän tanıştı. Qazan başlığı İlsur Metşin isä üzeneñ kollegası Sergey Bajenovnı qabul itte. Ul Mintimer Şäymiev isemennän Ästerxan başlığına Qazanıñ 1000lığı istälegenä medalen da tapşırdı.

3 mayda isä respublikanıñ Mädäniät ministrlığında da Ästerxan delegatsiäse wäkilläre belän oçraşu uzdı. Bu xaqta bezgä ministrlıqnıñ mäğlümät üzäge xezmätkäre Elena Krupnova söyläde.

Oçraşuda Ästerxan xakimiäteneñ mädäniät idäräse citäkçese Valentina Lyaxova häm ölkäneñ Mädäniät ministrınıñ berençe urınbasarı Elena Emeliçeva qatnaştılar. Alarnı Mädäniät ministrı Zilä Wälieva häm ministrnıñ urınbasarı Ayrat Capparov qabul ittelär. Oçraşuda ike töbäk arasında mädäni xezmättäşlek mäs’äläläre tikşerelde häm şulay uq täcribä urtaqlaşu da buldı. Belgänebezçä, Ästerxan üzeneñ yubileyın bilgeläp ütäçäk. Ä Qazan şuşı ölkädä cıyılğan bay täcribäse belän urtaqlaşa ala

İşetkänegezçä, ästerxanlılarnıñ Qazanğa kilülärneñ tağın ber maqsatı – qazannıñ meñyıllıq yubileyın ütkärü täcribäse belän tanışu. Bilgele bulğança, Ästerxan üzeneñ yubileyın ütkärergä cıyına. 450 yıllığın. Gärçä, İdel buyındağı älege şähär küpkä olıraq, anıñ inde 14 ğasırda uq zur tatar şähäre buluı tarixçı, ğalimnärgä bilgele bulsa da. Xäyer, bu xaqta ästerxanlılarğa iskä töşerüçe bulmadı.

Şulay itep, Ästerxan belän Tatarstan xakimiäte wäkilläre ike yaqlı xezmättäşlek turında kileşte, ber-berse xaqında matur süzlär söyläde, büläklär bireşte. Läkin törle çaralar, oçraşular barışında Ästerxan şähärendä urnaşqan mäçet tiräsendäge nizağ, Ästerxan başlığı Sergey Bajenovnıñ üzlärendäge äle tözelep tä betmägän din yortın cimerergä quşuı xaqında iskä aluçı bulmadı. Härxäldä, räsmi oçraşularda älege temanıñ iskä alınuı turında mäğlümät bulmadı. Ästerxanlılarnıñ Qazanğa säfärennän şuşı mäs’äläneñ dä çişeleşen kötkän Ästerxandağı millättäşlärebez, milli cämäğätçelek älege sorawğa cawapnı ala almadı. Alay da, qayberäwlär Qazanda medal' alğan Sergey Bajenov Ästerxandağı mäçet xaqında üz fikeren üzgärter digän ömettä qalalar.

Gölnaz İlgizär

XS
SM
MD
LG