Accessibility links

җомга, 9 декабрь 2016, Казан вакыты 05:00

Qazan citäkçeläre tatar jurnalistların nik yaratmıy?


Qazannıñ citäkçese inde şaqtıydan alışınsa da, şähär idäräsendäge kadr üzgäreşlär äle haman tämamlanmadı. Düşämbe könne alarnıñ çirattağıları buldı. Şähär merı İlsur Metşinnıñ matbuğat särkätibe itep Natal’ya Bastrakova urınına jurnalist Yuliya Vasil’eva bilgelände. Ä Qazan başqarma komitetınıñ mäğlümäti-analitik bülege citäkçese Änwär Minhacev buldı. Vasil’eva da, Minhacev ta jurnalistlar, elektron mäğlümät çaraları wäkilläre. Yuliya Vasil’eva İntertat.ru elektron gäcitennän. Ul anda baş möxärrir urınbasarı wazifaların başqardı. Beleme buyınça jurnalist bulsa da, Yuliya tutaş Qazan däwlät universitetınıñ säyäsät kafedrası aspiranturasın tämamlağan, säyäsi fännär kandidatı. Änwär Minhacev ta töşep qalğannardan tügel. Ul Rigada tuıp üsä, soñğı yıllarda Qazanda yäşi häm eşli. Qazan däwlät universitetınıñ tarix fakul’tetın tämamlıy. Törle respublika gäcitlärendä, Variant, Yaña ğasır kanallarında eşli, RBK telekanalınıñ cirle xäbärçese bulıp tora. Minhacevnıñ soñğı eş urını – Tatar-inform agentlığı. Menä şundıy layıqlı ğına kürengän keşelär.

Läkin milli cämäğätçelekne ber närsä borçıy. Nigäder, Qazan başlığınıñ jurnalistlar belän aralaşuı, mäğlümät taratu eşläre belän inde menä qayçannan birle tatar telle tügel, ä rus telle belgeçlär şöğellänä. Ällä tatar jurnalistları arasında şähär citäkçelegeneñ eşçänlege xaqında mäğlümät taratırlıq äybät belgeçlär yuq, ällä başqa säbäplär – äytüçe yuq. Şunısı ğına açıq, rus telle, rus millätennän bulğan xezmätkärlärdän milli mäs’älälärğä iğtibar kötep bulmıy, tatar telendä mäğlümät alu da mömkin tügel. Respublikada ike däwlät tele buluğa da qaramastan, Tatarstanda çınbarlıqta haman da rus tele genä räsmi tel bulıp qala birä. Bu yulı da şähär başlığınıñ mäğlümät taratuçı, jurnalistlar belän eşläwçelärneñ tatar telenä iğtibarı ällä ni zur bulmas kebek. Härxäldä, berniçä yıl däwamında räsmi tatar-rus telle İntertat elektron gäcitendä eşlägän däwerendä Yuliya Vasil’eva tatar telendä aralaşa başlamağan. Şulay itep, Qazan xakimiäteneñ eşçänlege turında yänä rus telendä genä mäğlümät taratılaçaq.

Ä nindi eşlär beläm şöğellänälär soñ soñğı aralarda Qazan citäkçelegendä? Kamil İsxaqov İlsur Metşinğa alışınuğa da qaramastan, şähär öçen haman da aktual’ bulıp qalğan yullarnı tözekländerü, toraq kommunal’ xucalıqnı torğızu eşläre. Monnan tış, 16 mayda Qazannıñ Başqarma komitetı citäkçese Marat Zahidullov citäkçelegendä şähärne üsterü planın buldıru eşläre tikşerelde. Xäzer äzerlänä torğan älege planda şähärdä ekologik wazğiätne üzgärtü, Qazannıñ tarixi üzägen saqlaw, qalğan öleşen inde älbättä, kebek mäsällär berençe urında tora ikän. Plan ağımdağı yılnıñ azağında inde qabul itelergä tieş. Qazanda Vladimir Putinnıñ yullamasın tormışqa aşıru mäs’äläläre dä, bigräk tä inde demografik wazğiät iğtibar üzägendä. Şähär xakimiäteneñ Eşlekle düşämbesendä şuşı xaqta süz alıp barğanda, İlsur Metşin bezneñ şähär bala tabu buyınça berençelär rätendä bulsın ide, digän teläk belderde. Üze 3 bala tärbiälägän Metşin älege problemalarnı iğtibarsız qaldırmas, digän ömettä qala qazanlılar.

Gölnaz İlgizär

XS
SM
MD
LG