Bu könnärdä Tübän Qamanıñ 27nçe mäktäbe kürşe respublikadan kilgän qunaqlarnı qabul itte. Kilgän uqıtuçılar tatar şağire Fatix Kärimneñ tuğan awılınnan, şağir uqığan mäktäptän ide. Başqortstan uqıtuçıları ğına tügel, bu oçraşuda Fatix Kärimneñ qızı Läylä Kärimova dä buldı. Älege oçraşunıñ maqsatı turında Başqortstannıñ Bişbüläk rayonı Ayеt awılı mäktäbe direktorı El'mir Şäripov bolay dide:
Bez monda täcribä urtaqlaşu maqsatı belän kildek. Ämma inde närsä disäñ dä bu oçraşunıñ oçında tora Fatix Kärim. Şağir uqığan mäktäptä anıñ süzläre bügen deviz bularaq yañğırıy - Üzeñ turında uylama, ileñ turında uyla! Bu bezneñ yäşäw prinsibı da. Uquçılarnı da bez şulay tärbiälibez!Tübän Qamanıñ häm Başqortstannıñ Ayıеt awılı mäktäpläre arasında duslıq 1999 yıldan kilä. Ul çaqta tübän qamalılar Fatix Kärimneñ tuğan awılında Ayеtta yaña muzey açılu tantanasında qatnaşqan. Şul waqıttan başlap ike mäktäp daimi aralaşa, täcribä belän urtaqlaşa. Ä bu ğämällärneñ başında Tübän Qamanıñ 27nçe mäktäbenä nigez saluçı, fidaqär şäxes Robert Safiullin tora. Ul Fatix Kärim isemen, anıñ icatın yäş buınğa citkerüdä zur öleş kertkän. Bügen mäktäptäge muzey şağirneñ tormış häm icat yulına bağışlanğan materiallarnı saqlıy.
Robert äfände oyıştırğan mäktäpneñ sisteması ğomumän unikal'. Biredä balalar tuğızınçı sıynıfta uq qaysı hönärne saylayaçağın bilgeläp quya häm aldağı ike yılda mäktäpkä maxsus çaqırılğan belgeçlär yärdämendä äzerlänä başlıy, ingliz tele, meditsina, texnik yäki başqa fännärdän östämä belem ala. Alay ğına da tügel, älege mäktäp şifaxanädä yatuçı balalarğa da belem alırğa mömkinlek birä, monıñ öçen balalar şifaxanäsendä mäktäpneñ bülekçäse eşläp kilä, ä inde urınnan tora almağan balalar yanına uqıtuçılar üzläre kilä. Mondıy mäktäplär Rusiädä Mäskäwdän qala Tübän Qamada ğına bar, di belgeçlär. Üz ğömeren mäktäpkä bağışlağan Robert Safiullin bügen inde yuq. Ämma anıñ mäktäbe bügen dä çäçäk ata. Balalar Fatix Kärimneñ icatı belän qızıqsına, anıñ şiğerlären yattan uqı.
Kilgän qunaqlar öçen mäktäp uqıtuçıları, uquçıları bik tığız programma äzerläp, konsertlar, açıq däreslär başqa qızıqlı çaralar oyıştırdı. Şağirneñ qızı Läylä xanım Kärimova üz şatlığı belän urtaqlaştı:
Minem isem kitte - yaña şähärdä, yaña mäktäptä ätiemne şul qädär yaratalar! Küñelem bik kütärelde. Şul çaqlarda äniemneñ süzläre iskä töşä - Fatix, sine yaratalar, sine onıtmıylar, sine uqıylar!Fatix Kärim - ber ğayıpsezgä törmälär wäxşäten toyğan. Alay ğına da tügel, ul suğışnı başınnan axırına qädär uzğan şağir. Redaksiälärdä, totqınlıqta tügel, ä suğışnıñ iñ qaynar noqtalarında bulğan ul. Suğışta ul bik küp icat itkän. Bezgä miras itep Fatix Kärim 100gän şiğerlären, poemaların, povest'lären qaldırğan. Suğış tämamlanırğa bik az ğına waqıt qalıp barğanda şağir yaw qırında wafat bulğan. Fatix Kärim iseme taptalmağan, anı ixlas küñeldän iskä alalar. İñ möhime - ul xalıq küñelendä.
Al'bina Zäynulla
