Accessibility links

пәнҗешәмбе, 8 декабрь 2016, Казан вакыты 08:53

Tatar yäşlären “Tatar tarixı” belän tanıştırdılar


Tatar tarixi dip atalğan akademik kitapnıñ ikençe tomı inde berniçä ay elek basılıp çıqtı. Tarix institutında anı täqdim dä itkännär ide. Läkin, Tatar yäşläre forumına cıyılğan altı yözgä yaqın tatar balasına, kitapnı tözüçelär süzenä qarağanda, iñ ğädel häm döres yazılğan millät tarixı belän tanıştıru farız ğämäl dip tapqannar küräseñ. Altı yözdän aşu xalıq zalğa kerep tuldı. Prezidiumğa Tatar tarixınıñ ikençe tomın tözüçelär kerep utırdı. Tarix institutınıñ mödire, Şäymievnıñ säyäsi kiñäşçese Rafail Xäkim, fännär doktorları Damir İsxaqov, Fayaz Xucin, fän kandidatı, Rusiä islam universitetı rektorı İldus Zahidullin. Ä urtada, töp fiğura. Monısı Tatar kongressı başqarma komitetı räise Rinat Zakirov. Ul bit Tatar yäşläre forumın oyıştırunı citäkli. Xuca räweşendä süzne dä berençe ul aldı.

Audio

Tatar kongressı räise Rinat Zakirovnı işettegez. Zakirov üzennän soñ, süzne Rafail Xäkimgä birde.

Аудіо

Rafail Xäkim tatarça söyläp betergäç kenä, zaldağı tatar yäşläreneñ tatar telen belmäwläre açıqlandı. Qul kütärdelär, kem tatarça belmi. Bik az keşe bulıp çıqtı. Qayan sanap ölgerrgännär, 30 keşe didelär. Nu bolay bulmıy bit inde cämägat'stvo digändäy, Rafail Xäkim yañadan urısça söyli başladı. Ä inde söylärgä dip mimbär yanına çıqqan Fayaz Xucin kötep tora. Anıñ da äyter süzlär bar, tatar yäşlärenä. Çönki, ikençe tom kitapnıñ möxärrire ul. Nu nişçava, urıs äytmeşli. Rafail Xäkim, 30 lap tatarça belmäwçe öçen urısça söyläp betergäç, Fayaz äfändegä dä süz birelde. Ul olpat ğalim. Qazannıñ meñ yıllığın raslar öçen, üz qulları belän, köräk kütärep Qazan Kirmänen arqılığa -buyğa qazıp çıqqan keşe. Şunda, çex aqçası da tabıldı. Meñ yıllıq ta raslandı. Ä Fayaz Xucin Tatar tarixı kitabı turında bolay dide.

Fayaz Xucin söyläp betergäç, süzne Damir İsxaqov aldı. Şulay uq olpat ğalim, Kongressta ber tulı bülekne citäkle. Tatarnıñ millät bularaq üseş strategiäsen buldırırğa alınğan keşe. Ä bu oçraqta ul, Tatar tarixın öçençe tomın redaksiäläyäçäk keşe

Damir İsxaqovtan soñ, Rusiä islam universitetına rektor itep quyılğan, tarix fännäre kandidatı, İldus Zahidullin söyläde. İldus äfändeneñ urısça söylägän çığışı bik matur bette. Napoleon süzläre belän. Nindi genä urısta qazınma, tatar kilep çığa dide.

Şunnan täqdim itü bette. Kitapnı qaya satıp alu mömkin - şunı iğlan ittelär. Teläsägez mondağı ğalimnärdän avtograf ta alıp bula didelär. Läkin, ğalimnär, çara betü belän yuqqa çıqtılar. Avtograf alırğa teläwçelär näwmizlänep qaldı. Yuqqa buldı monısı. Çönki, çaranıñ ikençe öleşe däwam itte. Monda, Litwaniä tatarları turında töşerelgän, Min morzalar däwamçısı dip atalğan dokumental' fil'm kürsätelde. Annarı , delegatlar aşarğa kittelär. Kiçke yaqta, UNİKSnıñ zur zalında Sabantuy turında tamaşa belän yuandılar.

Räfis Cämdixan

XS
SM
MD
LG