Ramazanda iftar aşlarına olıraq yäştäge wäkillär kübräk mäçetlärgä cıyılsa, yäşlär isä üzlärençä awız açu mäcleslären oyıştıra. Xäzerge köndä Qazan finans-iqtisad institutında, Tatar däwlät gumanitar-pedagogiqa universitetında, tözeleş-arxitektura akademiäsendä iftar mäclesläre inde ütte. Anda berniçä distä yäşlär cıyılıp çäylär eçep, İslam turında leksiälär uqıdı. Pänceşämbe könne isä Qazan däwlät universitetında da xäyriä iftar aşın oyıştıru farazlana. Uzğan yılnı isä däwlät universitetındağı bu çarağa 150 şäkert cıyılğan ide. Ramazan waqıtında Rusiä İslam universitetı studentların da buşlay aşatalar.
Elekkedän qalğan matur ğädätne iskä alıp bulsa kiräk, pänceşämbe könne Törkiä yuğarı uqu yortlarında belem alıp qaytqan, qayçandır tatar-törek litseylarında uqığan tatar yäşläre dä iftar mäclesenä cıyılırğa uylıy. “Bäxetle” kibeteneñ “Barbekyu” kafesında uzaçaq bu çarağa 30-40 keşe çaqırılğan. Ğomumän imamnar belderüençä, yäşlär arasında uraza totuçılar arta bara ikän. “Qazan nurı” mäçete imamı Röstäm xäzrät Zinnurov äytüençä, Ramazan ayındağı täräwix namazlarına xätta 12-14 yäşlek balalar da kilä. Älege “Qazan nurı” mäçetendä küp kenä Qazandağı ğibädät yortlarındağı kebek köndä iftar aşları oyıştırıla. Rizıqlata xalıq yärdäm itä ikän. Bu xaqta Röstäm xäzrät Zinnurov
Axşamnan soñ mäçetkä kilgän xalıqnı aşatabız. Ğadi keşelär yarmalar, bäleşlär, täm-tomnar alıp kilälär.
Röstäm xäzrät Zinnurov xalıqnıñ mäçetkä rizıqlar alıp kilüen elekkedän - ata-babadan qalğan ğädät dip belderä. Ä Tatarstan möselmannarı Diniä näzaräteneñ “İdel-Xac” fondına kergän “Zäkät” komitetı isä bıyıl moxtaclarğa dip azıq-tölek cıyılmasın äzerli. Bu xaqta İdel-Xac fondı citäkçese Röstäm Ğataullin
Ğädätkä qädär barlıq moxtaclarğa bäyräm waqıtında öställäre tulıp torsın öçen azıq-töleklär äzerlibez. Moxtaclar isemlegen möftiättän, awıl imamnarınnan beleşäbez.
Röstäm Ğataullin belderüençä, bu azıq-tölektän torğan cıyılma barlığı 500 keşegä äzerlänä. Aña 350 sumlıq azıq-tölek, ayırım alğanda, yarmalar, känfitlär, sıyıq may, konserva, xäläl tuşenкalar kergän. Aqçanı isä kübräk eşmäkärlär birä dide Röstäm Ğatawllin. Şulay uq ayırım ğadi keşelär arasında da alıp kilüçelär bar ikän. Ämma keşelärneñ küpçelege bügenge köndä öylärdä awız açtıru mäcleslären oyıştıra. Alabuğanıñ imamı Röstäm xäzrät Yasäwiev
Yıldan-yıl awız açtıruçılar arta bara. Bu bik şatlandıra, çönki uraza totmağan ber keşe moxtacnı tuqlandırsa bu inde uraza totuğa tiñ bula.
Röstäm xäzrät Yasäwiev Alabuğa şähärendäge ike mäçettä dä berençe könnän birle iftar aşları uzıp kilä dip belderde. Alarda 80 tiräse keşe cıyıla ikän.
Comğa könne Tatarstan möselmannarı Diniä näzarätendä däwlät wäkilläre öçen iftar mäclese oyıştırılaçaq. Anda märtäbäle keşelär, oyışma citäkçeläre çaqırılğan.
Landış Xarrasova
