Accessibility links

якшәмбе, 11 декабрь 2016, Казан вакыты 09:14

Açıq mikrofon: Bügenge köndä sezne ildäge nindi problemalar borçıy?


Tatarstanda, sänäğätne, iqtisatnı üsterü belän berrättän, xäyriä mä’säläläre, sotsial’ tarmağın cayğa salu eşläre belän dä şöğellänälär xakimiätlär. Ä şul arada xalıqnı närsä borçıy soñ, alarda ildä nindi zur xäl iteläse problemalar bar, dip sanıy? Bügenge Açıq mikrofon soraştıruı şuşı xaqta.

Bügenge köndä mine alkogolizm probleması borçıy. Yäşlär dä xäzer qartlar kebek bik qatı eçä başladılar.

İñ borçığanı - narkomaniä, çönki üzemneñ dä balalarım bar. Tağın inflyatsiä borçıy. Keşe närsäder alam dip aqçasın cıya, inflyatsiä yasap quyalar da, şul aqçasın totıp qala inde.

Sälämätlek sistemasınıñ xäle häm keşe xoquqlarınıñ yaqlanuı. Menä minem bügenge köndä apam awırıy. Operatsiägä ike yöz meñ aqça sorıylar. Ğömere buyı uqıtuçı bulıp eşlägän, ul andıy aqçanı qayan alsın di?

Xökümätebez pensionerlarğa häm yäşlärgä kübräk iğtibar itsen ide. Çit illärdäge pensionerlar yaxşı maşinalarda yöri, yal ietergä baralar. Ä bezneñ äbi-babalar köç-xäl belän şeşälär cıyıp yöri.

Bez - studentlar. Toraq mä’säläläre borçıy bezne. Torırğa fatirğa kerep bulmıy, xucalar qızlarnı ğına kertälär, yegetlärne kermilär. Avtobuslar belän dä problemalar bar: yä kerep bulmıy, yä keşe küp, yä yörmi alar.

Sälämätlek saqlaw mä’säläse borçıy. Tabiplarnı xarap ittelär xäzer. Alar bezgä doşmanğa qarağan kebek qarıy. Şifaxanägä yullama bar dip xäbär ittelär, ä tabip cibärmi. “Sez qart, anda ülsägez, sezneñ öçen min cawap birermen meni”, di. Niçä märtäbä barıp, yılıy-yılıy da sorap qaradım.

Eş xaqı, pensiä mä’säläse… Ozaq kötärgä turı kilä. Balalar, onıqlar bar bit äle.

Millätlärgä kimsetep qaraw mä’säläse borçıy. Urıslardan qala başqa barlıq xalıqlarnı bezdä kimsetü, alarnı xurlap qaraw däwam itä. Äle üzebezneñ Tatarstanda da çit illärdän kilgän xalıqlarnı mısqıl itälär, kimsetälär.

Fatir öçen döres tülämibez. Remont öçen tülibez. Kemgä tülibez anı yegerme-qırıq yıl inde?! Ul toraq mä’säläsen quzğatsañ, nindi genä problemalar yuq anda! Mäxşär anda!

Güzäl Zıyätdinova.

XS
SM
MD
LG