Accessibility links

якшәмбе, 4 декабрь 2016, Казан вакыты 03:08

“Törkiä Awazı” radiosınıñ Tatarça tapşıruları nigä tuqtaldı?


Azatlıq radiosınıñ 12 Ğinwar sanında Säğit Xäyri “Törkiä awazı Tatarça söyläwdän tuqtadı” digän xäbär tapşırğan ide. Çınnan da bu xäbär borçılu tudırdı. Bolay da Tatarstannıñ üzendä keşe şikelle tatarça tapşırular bulmawın istä totqanda qısqa dulqınnan Törkiäneñ Awazı aşa könenä ber säğat yasalıp kilgän Tatarça tapşırularnıñ yıl başınnan birle tuqtatuluwı qayğı tudurudan tış, Tatarstanğa da ber orım kebek bäyälänüwe ixtimal.

Cumhuriyet gazetasınıñ 15 Ğinwar sanında Fırat Kozok “TRT-da skandal - Tatarça tapşıru tuqtaldı” digän xäbäre basılıp çıqtı. Xäbärdä bolar yazılda:

TRT yäğni Törek Radio häm Televiziä oyışması çit illärdä Törkiäneñ imajına, küreneşenä, bäyälänäwenä skandal tudıraçaq ber qararğa qul quydı. Tapşırular häm programalardan cawaplı General direktor urınbasarı Muhsin Meteneñ taläbe buyınça “Törkiä Awazı radiosınıñ” Tatarstanğa yünälgän Tatarça tapşıruları, personal citeşsezlek argumentı belän tuqtatıldı.

Törkiäneñ Awazı Radiosı 26 teldä yasağan tapşırularında personal citmäwe arqılı qıyınlıqlar kiçerä. Şuşı qıyınlıq yäşälgän tellärdän bereneñ dä Tatarça buluwına işarä itkän Mete, “tik ber jurnalist belän Tatarça tapşırunı urnına citkerü mömkin bulmawı arqılı tapşıruda problemalar xasıyl bula, tapşırular tigez räweştä alıp barıla almıy” digän.

Bu wazğiättä här kön turıdan turı Tatarça tapşrularnı, alarnıñ satelit häm internet aşa qabatlanuwların däwam itterü mömkin bulmaw säbäple tapşırularnı tuqtatu täqdime general direktor Güney tarafınnan rastlandı.”


Çınnan da öç keşe belän genä ber säğatlek tapşırunı alıp baru ciñel eş tügel. Monı radio jurnalistları yaxşı belerlär. Tabiği bezne bigräktä monıñ säyäsi yağı bar mı, Törkiä şuşı qarar belän Tatarlarnı xisaptan sızdımı, digän yağı qızıqsındıra. Monnan elek bu turıdağı analizda General direktor belän xökümät kileşmäwe arqılı Tatar teleneñ qabat yanğıraw mäsäläse yaqın waqıtta xäl itelmäs, digän qaraş alğa sörelgän ide.

Inde bolar ni xätle döres - bu turıda beraz soraştırıp qaradıq. 1998 yılda Törkiäneñ Awazı Radiosında başlağan Tatarça tapşırularnı ğomüm öç-dürt keşe genä alıp barğan. Çınnan da alar konferensiälärdä Tatar-Başqortlar belän bäyle aktiflıqlarda mikrofon totıp yörilär, intervyülär ütkärälär ide. TRT çığımnarnı qısqartu öçen hämmäsen dä ştatqa almağan. Tik Ğäynur Şakirov şular arasınnan kadrğa alınuğa layıq tabılğan. Ikençe ber jurnalist Alsu Kamaleeva da Bursadağı Uludağ Universitetına urnaşqan.

Inde Tatarça tapşırularnı yañadan başlatu buyınça xökümät qatında söyläşülär başlıy digän xäbär bar. Läkin başlasa da bu yulı Tatarça tapşırular yartı säğattän artıq bulmayaçaq ikän.

* * *

Ütkän atnada Sadri Maqsudi turında programa tapşırğan TRT2 televiziä kanalı bu atnada Zäki Wälidi turında ber program tapşırdı. Emel Uygurnıñ 16 Ğinwarda säğat 22:30da tapşırılğan yartrı säğatlek programada Zäki Wälidineñ ğalimlek yağına ähämmiät birde. Qızı Prof. İsänbikä Toğannıñ “ätiem 5 yäştä Farsiça, altı yäştä Ğäräpçä öyrände” dip äytüwe qızıqlı ber mäğlümät buldı.

* * *

17 Ğinwarda ataqlı teatr artiskası Lale Oraloglunıñ cinaza yolası bulıp uzdı. Cinazağa bik küp sänğätkär qatnaştı. Ul Dr. Läbib Qarannıñ qızı ide. Qaran İstanbulda 1960-nçı yıllarda tözelgän Söyembikä oyışmasınıñ çitäkçese, “Tatarlarnıñ Töpçığışı”, “Sömseremneñ Cırları” kebek kitaplarnı aftorı ide.

Äxtäm İbrahim, İstanbul

XS
SM
MD
LG