Accessibility links

шимбә, 3 декабрь 2016, Казан вакыты 12:48

Semberdä “Aq Bars” isemle yäşlär oyışması barlıqqa kilde


Töp maqsatları – tatar yäşlären berläşterü, alarnı itctimaği häm säyäsi tormışta aktivlaştıru, ğöref-ğadätlärebezne qaytaru, ana telen saqlap qalu çarların kürü.

Eş 3 töp yünäleştä oyıştırılaçaq: ruxi, mädäni häm fizik tazalıq yaqlarınnan. Soñğısı – sport yärdämendä. Täqdim itelgän programmada küp niät-teläklär yazılğan. Alarnı tormışqa aşıru yulların bilgeläwdä oyıştıruçılar Qazan yäşläre täcribäsenä tayanırğa bulğannar. Qazannıñ törle yarım räsmi häm ictimaği oyışmalarınnan distädän artıq yäşlär kilgän ide. Oyıştıru komitetı utırışında süz başta alarğa birelde dä. Çığışlarnıñ töp mäğnäse – quyılğan maqsatlarnı tormışqa aşıruda nindi çaralar kürü häm üzara xezmättäşlektä nindi ısullar qullanu. Qazannıñ Yäşlär forumı citäkçese İlşat Säetov Bolay dide

(Çit töbäklär yäşläre belän aralaşu bezneñ plannarda da qaralğan. Bügenge çara – şunıñ ütäleşe kebek tä kilep çığa. Ä bolay, töp elemtä çaraları törle ğalimnär, ekspertlarnı çaqırıp, oçraşular oyıştıru, trening, konkurslarda qatnaşu yärdäm itär ide. Mäsälän, “Tatar yegete”, “Tatar qızı” konkurslarına wäkilläregezne cibärü faydalı bulır.)

Tatar yäşläre öçen cäyge yal oyıştıru belän şöğıllänüçe “İdel” isemle oyışma wäkile Marat Maksudovtan da ber özek.

(“İdel” oyışması oyıştırğan yal lager'larına kübräk yäşläregezne yullaw yaxşı näticälär birä. Kürenekle şäxeslärebez belän oçraşu, icadi bäygelär talantlarnı barlawğa da yärdäm itä. Mäsälän bıltır “İdelem aqçarlaqları” konkursı yuğarı ruxta uzdı. Talantlarığıznı bezgä yünältegez – ike yaqqa da fayda bulır, yäş talantlar üsep çığar)

Bötendönya Tatar kongressınıñ säxifä redaktorı Mönirä Säğidullina internet aşa törle töbäklär yäşläre wäkilläre belän elemtä totu, täcribä urtaqlaşu mömkinlekläre turında süz tottı. “Ömet” gäziteneñ redaktorı İsxaq Xälimev qunaqlarnı ölkädäge uñışlar häm çişelmägän mäs'älälär belän tanıştırdı.

Soñnan oştıru komitetınıñ räsmi utırışında citäkçelek saylandı. Töp wazifa şul uq İldar Usmanovqa yöklände. “Qazan belän elemtäneñ nindi faydasına ömetlänäseñ?” – digän sorawğa İldar oluğ ömetlär bağlawın belderde. Törle çaralarğa çaqırırğa wäğdä ittelär, alarnıñ täcribäsen kürep, üzebezdä dä şundıyraq uq çaralar oyıştırırğa tırışırbız, dide ul.

Ä qunaqlar nindi tä'sirlär belän kitälär, Qazan täcribäsennän nindi çaralar Sember cirlegendä dä berençe näwbättä qullanıla ala soñ? Şuşı sorawğa “Молодежь Татарстана ” gäzite xäbärçese Aliä Sabirova äytüençä, ölkäneñ ike şähärendä etnokomponentlı tatar mäktäpläre buluı beraz canğa cılılıq örgän. Dimäk, bötenläy ük ömetsez tügel äle xällärebez. Ä nindi çaralarğa kilsäk, Yäşlär teatrı oyıştıru – bar yaqtan da faydalı bulır ide. Monısı, älbättä, küp tırışlıqlar, taläp itä. Belgeç tä kiräk. Ä menä “Bez tatarça söyläşäbez”, digän aksiä öçen ällä ni zur äzerleklär kiräkmi. Sabantuylarda, küp tatar cıyılğan başqa oçraqlarda bik urınlı bulır ide bu aksiä. Ä bez kostyumnar, süzleklär, tüş bilgeläre belän yärdäm itä alırbız. Aqça tabıp kitersennär genä, dide Aliä xanım.

Ayrat İbrahim, Sember

XS
SM
MD
LG