Accessibility links

пәнҗешәмбе, 8 декабрь 2016, Казан вакыты 23:16

Mäskäwdä tatar diskotekası


7 aprel' kiçendä Mäskäwdä tatar diskotekası uza. Elekke zamannarda kiçke uyınnar, aulaq öylär görlägändä tamaşalarnıñ türendä garmunçılar bula. Alarnı maxsus çaqırta torğan bulğannar, läkin bügen garmunçılarnı di-djeylar almaştıra bara. Mäskäw tatar diskotekasına maxsus Qazannan di-djee çaqırıla. Diskoteka Rusiä başqalasında yäşäwçe tatar yäşläreneñ oçraşu urını bulıp saylana häm internetta zur bäxäs quptara. WWW.TATARLAND.RU saytı 3 atna buyı quptara inde bu bäxäsne, menä nixayät anıñ näticälärenä ük barıp cittelär. Kiläçäktä tatar diskätüge oyıştırırlarmı ansı bilgesez, ä menä 7 aprel'dä ütkäne iğtibarğa layıq dip sanıy Rusiä başqalasınıñ tatar yäşläre. Mäskäwdä yäşäwçe Änwär isemle tatar yegete, tatarça naçar belsä dä, ike-öç ay elek WWW.TATARLAND.RU digän tanışu saytı barlıqqa kiterä. Bu saytqa yäşlär tiz tartıla, ber-berse belän tanışa da başlıylar. Şunnan Änwär Mäskäwdä tatar yäşlären bergä cıyıp, törle tamaşalar oyıştıruçı Marat belän oçraşa. Şunnan Marat belän Änwär üzläreneñ tanışu saytı arqılı xäbär taratıp, Rusiä başqalasındağı urıslaşqan tatarlarnı cıyıp tatar diskätüge yasarğa bulalar. Elegräk aulaq öylär, kiçke uyınnar kiñ taralğan zamannarda tamaşanıñ töp geroyları garmunçılar bula. Ber awılda, ber cirdä bayandamı, talyandamı uynawçı bulmasa alarnı başqa cirdän çaqırtqannar. Bügen şaw-şulı tamaşalarda, iyüllärdä garmunçılarnıñ abruyı bette, alarğa almaşqa di-djeylar kilde. Uzğan atna axırında Mäskäwdä ütkän diskätükkä dä maxsus Qazannan di-djey Şäkertne çaqıralar. Alıp baruçılar üzläreneke bula. WWW.TATARLAND.RU nıñ Mäskäwneñ “Freş” tönge klubında berençe tatarça diskätüge bula bu. Oyıştıruçılar yaqınça 500 yaqın keşe kilde dilär. Diskätükneñ sponsorı Mäskäwdäge “Bäxetle” isemle kibetlär çeltäre bula. Bilet bäyäse Mäskäwlär öçen älläni qimmät bulmıy, alay disäk tamaşanı oyıştırğan saytnıñ aralaşu, fikerläşü bülegendä oyıştıruçılar bu çaranı aqça eşlär öçen genä yasağannar dip yazuçılar da oçrıy. Qazanda tatar diskotekaları yış bula. Xalıq ta küp yöri, qaywaqıt eteş -törteş qıçqırış. Mäskäwneñ “Freş” klubındağı urıslaşqan, läkin tatar cırlarına susağan tatar yäşläre alay uq qıçqırmasalar da xayran cıyılalar. Alarnıñ härbersenä kergändä al, zäñgär töstäge tasmalar tağıp kertälär. Al tasma minem tanışasım kilä, ä zäñgäre aralaşasım kilä digänne añlata. Şul tasmalar buyınça yäşlär uzara tanışalar, aralaşalar. Qazannan kilgän di-djey alarğa Tatarstandağı “Tatar radioları”nan yañğırağan cırlarnıñ remikslarına bietä. Mäskäw yäşläre Qazandağı tatarça cırlawçı “İttifaq” törkemen ayıruça üz kürälär. Alarnıñ cırların maxsus sorawçılar da bula. Şulay itep kiçke 6 dan 12 qädär uzğan Mäskäw tatar diskätüge kemnärgäder bik oşıy, kemnärgäder oşap betmi. Çönki biyu köyläreneñ kübese tatarça bula. Mäskäwneñ yeget-qızları Qazannan tağın şunıñ belän üzençälekle, diskätüktä bulğannarı öylärenä qaytuğa internetqa kerep, WWW.TATARLAND.RU saynıñ fikerläşü bülegenä bu tamaşanıñ qaysı yağı belän istä qaluın, närsä oşawın, närsä oşamawın barsında irenmiçä yazıp quyğannar. Qazan tatar yäşlärendä bu äyber yuq däräcäsendä. Annan soñ Tatarstanda internet buyınça tatar diskätügenä 500 keşe cıyıp bulmıy äle, ä Mäskäwdä mömkin. 7 aprel'dä uzğan tamaşa moña misal ide. Ğädättä Qazanda törle şou-çaralarğa qunaqlarnı Mäskäwdän çaqıralar, ä bu oçraqta Mäskäwlelär Qazannan çaqırtırğa mäcbür bulğannar. Rüsiä başqalasındağı tatar yeget-qızları, aralarında urıslarda bar, alar yaxşı, yäşlärçä tatar biyu köylären naçar belälär ikän. “Barıp çıqsa tatar di-djeyların cälep itep, mondıy çaralarnı Mäskäw yäşläre öçen tağın yasarğa ide !”- di WWW.TATARLAND.RU saytı xucaları. Röstäm İsxaqi

XS
SM
MD
LG