Federal' avtonomiä räise İldar Ğıl'metdinovnıñ may ayınıñ berençe yartısında uzğan “Milli mädäniätlärneñ Yäşlär assambleyası” digän çarada qatnaşuınnan faydalanıp, aña “Çişmä”ne qaytarunı sorağan 6000 imzalı möräcäğät tapşırılğan ide. İlbaşı Putinğa citkerüenä ömetlänep. Ğözer Prezidentqa barıp citkänme-yuqmı älegä nämäğlüm. Şulay uq anıñ mönäsäbäte turında da Mäskäw taraflarınnan läm-mim süz işetelmi. Şulay da “Berdäm Räsäy” firqäseneñ cirle bülekçäse başlığı Anatoliy Yılenkin älege mäs’äläne kütärep çıqtı. Bu turıdağı fiker alışuda şul uq firqäneñ cirle parlamenttağı fraksiäse citäkçese Nikolay Yäğodin, fraksiä äğzası deputat Rasix Ğatawllin, Ölkä Xökümäteneñ Mäğlümät çaraları belän elemtä idäräse başlığı Sergey Davıydovlar da qatnaştılar. Nikolay Yäğodin äytüençä, “Berdäm Räsäy” tırışlığı arqasında, 2007-yılğı ölkä byudjetında tele- häm radiotapşırularğa yärdäm sıyfatında aqça qaralğan. Anı milli tapşırular öçen dä qullanu ixtimal.
Mäğlümlät çaraları belän elemtä idäräse milli programmalar buldıru buyınça konkurs iğlan itkän, läkin GTRK “Volga” litsenziäsendä Räsäy xalıqları tellärendä tapşırularğa röxsät yuq. Moña barı tik “2х2 na Volge” digän cirle telekanalnıñ ğına xoquqı bar. Elek tä tatarça “Muzıkal' qotlawlar” tapşıruı alıp barğan kanalnıñ direktorı Vladislav Sovetkin da utırışta bar ide. Läkin anıñ da bit töp xucaları şul uq Mäskäwdä. Dimäk, yänä aqça mäs’äläse qalqıp çığa. Qanunnar çığaru cıyılışı byudjetqa salğan aqçanıñ ber öleşe şuña da qullanıla ala, didelär. Tik tağın ber qıyınlıq: bu kanal tapşıruları ölkä üzägennän 50 çaqrım yıraqlıqta ğına qabul itelä. “Berdäm Räsäy”neñ cirle liderı Yılenkin xalıqnıñ yaratıp qarağan tatarça häm çuaşça tapşıruların citkerü öçen, rayonnarda barlıq mömkinleklärne dä qullanu küzdä totıla, dide. Tapşırularnıñ küläme ayına ike märtäbä 20шәр minutlıq çığarılış. Şunı da östäp äytü urınlı bulır kebek. Çuaş tapşıruı “Yatkär” tatar milli xäräkäte tırışlığı arqasında ğına açılğan ide. Bu yulı çuaş yegete Yılenkin, çuaş öçen tırışıp, tatarğa da yul aça bulıp çığa. Cirle parlament deputatı Rasix Ğataullin, programmalarğa yärdäm yözennän, Redaksion şura tözergä täqdim itte. Maqsatı – tapşırularnıñ temaların barlaw häm ağımdağı mäs’älälärne xäl itü. Monısı da möhim kebek, çönki älege söyläşülärneñ Dumağa saylawlar aldınnan piar kampaniäse genä bulıp çığuı ixtimal, dip şiklänüçelär dä bar.
