Soñğı könnärdä Tatarstan Fännär akademiä binası qaynap tora. Ütkän atnada akademiklar häm möxbir äğzalar saylawı bulsa, sişämbe könne xisap-saylaw cıyılışı uzdı. Anda prezident M.Ş.Şäymiev, Däwlät şurası citäkçese F.Möxämmätşin, Tatarstan Fännär akademiäse ğalimnäre cıyılğan ide. Başqortstan fännär akademiäse prezidentı Ayrat Şammazov ike respublika ğalimnär xezmättäşlegen tağın da canlandırırğa kilgän. Tatarstan Fännär akademiäsen Äxmät Mazarov citäklägäç kötelgän reformalar küzgä kürenä başladı. 26 yaña akademik häm möhbir äğza saylanğaç, akademiä yäşärde. Yäşärü süze turı mäğnäsendä äytelmi, çönki Respublikanıñ yaña mäğärif häm fän ministrı Räis Şäyxelislamov urınına annan berniçä yäşkä ölkänräk Nail' Wäliev bilgelände. Bu turıda ukaz çıqqan könne açılğan cıyılışta iñ başta Tatarstan prezidentı Mintimer Şäymiev çığış yasadı. Ul üzgäreşlär, näticäle eşläw kiräklege turında äytte. Şul maqsat belän ministr itep bilgelängän Alabuğa pedagogiä institutı rektorı Nail Wälievnı tanıştırıp, prezident yaña citäkçegä çäçäk tapşırdı. Elekke ministr Räis Şäyxelislamovqa däğwä yuq, dide prezident, süz kadrlarnıñ potensialın tulıraq faydalanu turında bara. Räis Şäyxelislamovnıñ potensialı yaña urında – mäğärifne üsterü institutınıñ citäkçese sıyfatında qullanılaçaq. Äytergä kiräk, yaña ministr mäşäqätle eştä bäxetle itep xis itmägängä oşağan. Eşkä yegärle keşegä qamıt tabıla, dilär belgän keşelär.
Tänäfestä bez Räis Şäyxelislamovtan yaña eşe turında sorarğa buldıq. Mäğärifne üsterü institutı küptän tügel möstäqillegen yuğaltıp, Gumanitar universitetqa quşılğan ide.
Şulay itep, ministr alışındı, ä fän tarmağı reforması däwam itä. Akademiä Prezidentı Äxmät Mazarovnıñ ille minutlıq dokladında bu xaqta bäyän-bäynä söyläde. Ber qızıq mizgel istä qaldı. Akademik Qamıl Wäliev Rusiä biznesınıñ fängä mönäsäbäten tänqitläp, xätta qadaq suırğıçnı da amerikadan qaytaru turında söyläde.
Prezident Şäymiev üz başınnan kiçkän xälne söyläde. Ul berniçä yıl elek Amerika qayçısın satıp alıp, anıñ sıyfatı belän qänäğät ikän.
Xätta qayçı, qadaq suırğıç kebek närsälärne dä çığara almağan Rusiä iktisadın ğalimnär üzgärtergä tieş. Tatarstan ğalimnärenä däwlät yärdäme artaçaq. Çärşämbe könne yabıla torğan ğomumi cıyılışta yaña akademiklar raslanaçaq, prezidium häm vitse-prezidentlar saylanaçaq. Gazizova El'mira
