Maxaçqala. Dağstan başqalasında bügen, qoral häm xärbi kiräk-yaraqlar urlawda häm alarnı soñraq satuda ğäyeplängän 7 urıs ğäskärie häm ber sivil xezmätkärneñ eşen qarağan xärbi mäxkämä utırışı açıldı. Alar barısı da, uzğan yılnıñ mayında Kaspiyski şähärendä bulğan köçle şartlawnı tikşerü barışında qulğa alınğan ide. Älege şartlaw näticäsendä barlığı 43 keşe, şul isäptän 13 bala da hälak buldı. Tikşerüçelär äytüwençä, şartlawnı oyıştıruda qullanılğan mina näq menä, xäzer mäxkämä qarşına basqan ğäskärilär tarafınnan birelgän bulğan. Läkin mäxkämä şuşı ğäyepläwne raslawçı dälillär citärlek tügel dip, alarnı qarawdan baş tartı, utırışta barı tik, qoral kiräk-yaraqların urlaw, saqlaw häm transportlaw ğäyepläwläre genä tikşerelä. Ğäskärilär arasınnnan ikese üz wazifaların wayımsız başqaruda ğäyeplänä. Alarnı yaqlawçı advokatlar, saq astında totılğanda alar qıynaldı häm cäberlände dip belderde.
