Ministrlar Kabinetınıñ çirattağı sişämbe brifingı Tatarstanda 2003 yılda käräzle elemtä häm respublikada eçke turizm üseşenä bağışlandı. Mäğlüm ki, Tatarstanda käräzle elemtä belän soñğı yıllarda “Taif-Telkom” kompaniäseneñ “Santel” häm “Tatincom” kompaniäse eşlädelär. “Tatincom” başqa standartta eşläw säbäple, ul “Santel”ğa köndäş bula almadı. Şuña kürä “Taif-Telkom” käräzle elemtäneñ berdän-ber monopolistı ide. Soñğı 1-2 yılda Tatarstannıñ käräzle elemtä bazarına başqa kompaniälär kerä başladı. Uzğan yıl GSM standartında “Beeline” kerde, bıyıl fevral' urtasında “Megafon” kilep kerde. Xalıq, yäğni abonentlar, monı küptän kötte. Çönki monopoliä – monopoliä inde, üz bäyäsen üze quya häm tota. Başqa kompaniälär kilü käräzle elemtä bäyäsen töşerergä tieş ide. Çınnan da “Beeline” häm “Megafon” bik yün tarif plannarı täqdim itte. “Beeline” abonentları berniçä ayda 60 meñgä citte. “Megafon” abonentları berençe açılğan könne ük 1 meñ buldı. Läkin yün bäyälär täqdim itkän kompaniälärgä küçkän xalıq berazdan nıq qına aldanğanın sizde. “Santel” üz abonentlarına “Beeline” abonentları belän turıdan-turı elemtäne yaptı. Brifingqa kilgän “Taif-Telkom”, “Beeline”, “Megafon”, “Smarts” kompaniäläre wäkilläre mondıy wäzğıätneñ xalıq faydasına bulmawın añlıylar. Söyläşülär, añlaşular, kileşülär, bu barı tik “вопрос времени”, yäğni “waqıt mäsäläse” genä, dilär. Läkin jurnalistlar “Bu waqıt mäsäläse nindi waqıt eçendä xäl iteler?” dip qısqaç, “yartı yılda”, dip cawap birdelär. Dimäk, äle tağın yartı yıl Tatarstanda käräzle elemtä xezmäte bazarında xalıqqa fayda yasarlıq normal' köndäşlek, konkurentsiä bulmayaçaq.
