Accessibility links

якшәмбе, 11 декабрь 2016, Казан вакыты 03:33

Tatarstanda 23,000 keşe eşsez


Ul arada Tatarstanda utırışlar bäygese däwam itä. Ütkän atnada Tatarstan ministrlıqları yıllıq cielışların ütkärä başlağan ide inde. Waqıt citmäw, säbäple könenä ikeşär cielış ütä torğan buldı, bu atna planına küz salsaq, şul uk xälne küräbez. 4 martta mäsälän, ekologiä häm sälämätlek saqlaw ministrları xisap tottı. 6 martta elemtä häm sotsial yaqlaw ministrlıqları da eşlägän eşläre turında söyliäçäk. 7 martta isä, tözeleş häm toraq-komunal xucalıq öçen cawaplı däwlät oyışmasına da çirat citä. Bu könnärdä ğadi keşelärneñ tege yäki bu xakimiät tarmağınıñ alarnıñ yäşäyeşe öçen ni qädär tırışqanın belü mömkinlege bar.

Mäsälän, düşämbe könne xezmät häm mäşğüllek ministrlığı xisap tottı. Tatarstanda soñğı yılda urtaça eş xaqınıñ küläme 27,5% artqan häm ul xäzer 3,900 sum täşkil itä. Sänäğät ölkäsendä urtaça eş xaqı zurraq 4,700-5,000 sum tiräsendä isäplänä. 1,700 sumnıq eş xaqı, urtaça kitergän sannar arasında iñ azı häm anı awıl xezmätçännäre ala ikän.

Bu mäs’älädä dä tigezlek yuq, Bua häm Alekseyevski rayonındağı awıl xezmätçännäre tübän eş xaqı bäygesendä berençelekne yawlağan. Alarğa barı tik 1,500-1,600 sum birgännär, häm bu aqça yäşäw minimumı dip atalğan sannan da azraq. Ä Tatarstannıñ 5 rayonında eş xaqı inde 5 ay däwamında bötenläy tülänmi. Älege cielışta qatnaşqan premyer-ministr Röstäm Miñnexanov eş xaqı tülänmäw kebek küreneşne xurlıq dip atadı häm tiz arada beterergä çaqırdı.

Mäşğüllek ölkäsendä dä xällär maqtanırlıq tügel, 2002 yılda ere häm zur sänäğät oyışmalarında 12 meñ keşe eş urınnarınnan çığarıldı. Ütkän yılda ğomum eşsezlär sanı 5 meñgä arttı häm 2003 yıl başına alarnıñ sanı 23 meñgä citte. Şunısı ähämiätle, yuğarı uqu yortların tämamlağan yäş belgeçlär dä yıl sayın eşsezlär armiäsen tulılandırıp tora ikän.

XS
SM
MD
LG