Accessibility links

пәнҗешәмбе, 8 декабрь 2016, Казан вакыты 07:06

Ğiraq suğışı turında Mintimer Şäymiev, Aqsaqallar Şurası…


Ğiraqtağı suğışqa protest çaralarınıñ böten dönyada şawlap toruın televizor aşa küräbez. Tatarstannıñ mönäsäbäte dä ser tügel. Kem inde suğışnı xuplasın. Respublika prezidentı Mintimer Şäymiyıv bu xaqtağı fikerlären beldergändä, wäzğıätneñ bik qatlawlı ikänlegen yäşerep tormadı. Ul baylıq öçen nindi genä kisken ğämällär eşlänmäwe turında äytte. Kapitalnıñ çın yöze şulayraq, dide ul. Ber yaqtan bazar iqtisatı dönyanı tereltä, ikençe yaqtan keşeleksez ğämällärgä etärä.

Tatarstan cämäğätçelege Ğiraqtağı wäqığälär turında ber genä törle genä söylämi. Beräwlär möselman qärdäşlege nigezendä Ğiraqtağı qorbannarğa teläktäşlek beldersä, ikençelär neft häm maşina satu säwdäseneñ neçkäleklären iskä ala. Ägär dä Amerikanıñ Ğiraqtağı operatsiäse tämämlanğannnan soñ neft bäyäläre bermä-ber töşsä, Tatarstan neftçelärenä dä, byudjetqa da zur zıyan kilä. Bolay da buşıy başlağan qaznadan aqça alu tağı da qıyınlaşa. Federal' üzäk nefttän kilgän östämä keremnärgä poşlinanı häm salımnarnı kübräk üzenä alsa da, barıber neft bäyäläre Tatarstan yazmışına da tä'sir itä.

Tatarstan Aqsaqallar şurasınıñ suğışqa mönäsäbäte älege oyışmanıñ möräcäğätendä açıq itep äytelä. Respublika ölkännäreneñ sallı fikerläre başqa oyışmalar şaw-şularınnan ayırılıp tora.

Döres, süz belän agressiäne xökem itü häm yıraqtağı ğäräplärne qızğanu awır tügel. Başqa illärdä tınıçlıq söyuçelärneñ protestları yözär meñ keşe cıysa, Rusiädä, ayırım alğanda Tatarstanda, miting-piketlarğa 20-30 keşedän artıq keşe cıyılmıy, aları da 30-40 minut qıçqırğannan soñ tiz genä tarala. İdel-Ural yaqları häm ğomumän Rusiä uram säyäsäte belän şöğellänü öçen caylı tügel. Klimat ta salqınraq, säyäsi temperatura da tübän bula.

Konyaktağı xalıqlardan ayırmalı bularaq, tatarstanlılar pragmatik qaraşta. Äytik, KamAZdan Ğiraqqa 100 avtomobil' cibärelgän. Suğış başlanu säbäple Ğiraqtağı KamAZlar cibärüne tuqtatıp torğannar. Bombalar astında yäşägän il aqça tüli almıy. Ägär dä suğış tuqtalıp bu yaqlardağı xucalıq öçen kiräkle maşinalarnı satıp alu däwam itsä, şuşı yılda ğına 3 meñ KamAZ cibärelergä mömkin. Häm şuşı avtomobillärneñ cibärelmäwe KamAZğa da, Tatarstanğa da zıyan kiterä. Ğomumän alğanda, Ğiraqtağı suğış mäsäläsendä çın wäzğıätne belü citmi, Saddam Xösäyenne küklärgä çöyep maqtawçılar, anı ğıraqlılar ämir itep üzläre saylap quyğan, dimäk, ul alarnı qänäğätländerä diyuçelär dä bar. Saddam diktator häm xalıqnı anıñ yawızlığınnan qotqarırğa dip sanawçılar yuq tügel.

XS
SM
MD
LG