Accessibility links

якшәмбе, 4 декабрь 2016, Казан вакыты 19:26

Qazanda Sabantuyı qayçan?


Tatar barda Sabantuy bar. Şimbä–yäkşämbedä awıllarda häm qayber rayon üzäklärendä milli bäyrämebez görläp ütäçäk. Ä menä Qazanda iyünneñ 21nä bilgelängän Sabantuy uñayınnan nizağ çığarğa tora. Bu xaqta comğa könne “Вечерняя Казань” gazetası berençe bitendä “Menä siña äbi, Sabantuy!” digän zur mäqälä bastırıp çığardı. Eş şunda ki, atna-un kön elek Tatarstan Prezidentınıñ Sabantuylar uzdıruı turında färmanı dönya kürgän ide. Anıñ nigezendä Qazan Sabantuyı 21 yüngä bilgelände. Ä Rusiä xökümäte qararı nigezendä ul kön eş köne dip iğlan itelgän. Çönki 12 yün - Rusiä köne, yäğni bäyräm, yal köne dip quyılğan.
Gazeta fikerençä, respublika xökümäte häm Qazan xökümäte ığızığı arasında bu xaqta onıtıp cibärgännär. Çınnan da, Qazan kebek şähärdäge Sabantuyın annan-monnan, aşıq-poşıq äzerläp kenä bulmıy. Citmäsä, 21nä inde möxtäräm qunaqlarğa çaqırular da cibärgännär.
Qısqası, xakimiätkä yaqın arada ikeseneñ beresen saylarğa turı kiläçäk. Yä Rusiä xökümäteneñ qararına küz yomarğa, yä Sabantuyın tağın 1 atnağa kiçekterergä qala. Çönki 22 yündä, Böyek Watan suğışı başlanğan köndä ğädättä cır-biyu, uyın-kölke belän uza torğan bäygene uzdıru bötenläy kileşmi.

XS
SM
MD
LG