Tatarstanda tuğan telebezdä uqıtu kierenke tora...

Soñğı aylarda Tatarstan şähär-rayonnarında berençe sıynıfqa balalar tuplaw başlandı. Tatarstan mäğärif ministrlığı belgeçläre äytüençä, ata-analar balaların tatar sıynıflarına birergä bik aşıqmıy, çönki alar tatar mäktäben tämamlap balasınıñ yuğarı uqu yortında rusça uqı aluına şik belderä. Şuña kürä Mäğärif ministrlığı bu mäs’äläne beraz bulsa da cayğa salu maqsatınnan Yuğarı uqu yortlarında tatar telen öyrätü häm tatar telendä predmetlarnı uqıtu buyınça cawaplı keşelär belän eşlekle utırış uzdırdı. Biredä süz yuğarı uqu yortlarında tatar telen mömkin qädär kübräk kertü turında bardı. Tatarstan Respublikası ministrlar Kabinetınıñ tellärne üsterü bülege citäkçese Kim Miñnullin äytüençä, bügen bu ölkädäge eşlärne 90nçı yıllar belän çağıştırıp bulmıy. Ul zamanda milli mäğärif kütäreleş çorı kiçergän. Xäzer isä sünep bara diärgä dä bula. Uqu yortlarında barısı da millätpärwärlär eşçänlegenä qaytıp qala. Ämma eşneñ alğa baruı öçen urındağı citäkçelärneñ dä milli mäs’äläne añlawı kiräk. Läkin küp urınnarda bügen añlawnı tabuı qıyın. Çönki yuğarı uqu yortlarınıñ kübese Rusiä mäğärif ministrlığına qarıy, şul säbäple Tatarstan mäğärif ministrlığı tatar telendä uqıtunı taläp itä almıy.

Kadrlarğa kilgändä dä xäl iteläse mäs'älälär şaqtıy. Bu turıda da cıyılışta törle fikerlär äytelde. Yäşlärne yuğarı belem alğaç aspiranturağa qaldıru, tuğan telebez uqıtuçılarınıñ belemnären kütärü häm iñ möhime tatar telen uqıtu öçen cawaplı bulğan belgeçlärne tuplap Koordinatsiä Şurasın oyıştıru. Äytergä kiräk texnik yünäleştäge yuğarı uqu yortlarında tatar telen uqıtu kierenke tora. Ä gumanitar ölkädä boz quzğalğan inde. Mäsälän, kiläse uqu yılınnan Qazan pedagogiä universitetında barlıq fakul'tetlarda da tatar telen uqıtaçaqlar dip belderde älege cıyılışta tatar fakul'tetı dekanı Rädif Camaletdinov.

Ä menä Qazan Däwlät mädäniät universitetı qarşında milli sänğät institutı eşli ikän. Anda belem barı tatar telendä genä birelä. Anıñ citäkçese İlgizär Mirğalimov “Azatlıq“ radiosına menä närsälär söyläde:

Milli sänğät institutında 200 student uqı. Bez alarnı Respublika häm Rusiä töbäkläre öçen äzerlibez. Bıyıl barlığı 30 student tämamladı. İnstitut qısasında ğämäli sänğät bülege eşli. 1994 yılda milli sänğät kafedrası açıldı. Maxsus fännär tuğan telebezdä alıp barıla. Mäsälän maxsus instrument, maxsus derijirovanie, muzıka teoriäse däresläre.

Sez Qazan däwlät universitetı qarşındağı milli sänğät institutı citäkçese İlgizär Mirğalimovnı işettegez. Bügen älege institutta çığarılış imtixanı bulğan. Utız student milli sänğät belgeçlegen alıp çıqqan.

Landış Xarrasova, Qazan.