Accessibility links

якшәмбе, 4 декабрь 2016, Казан вакыты 06:54

İjaw yegete tärtip saqlağan arada cırlar icat itä


İjaw şähäreneñ Timeryulçılar mädäniät yortında “Güzäl” tatar cır häm biyu ansamble oyışqaç ta, kollektivqa millättäşebez, cırlar avtorı Rubis ağa Zaripov kilä. Ul üze eçke eşlär ministrlığı sistemasında xezmät itä, ämmä tatar mädäniätenä mäxäbbättä eş könennän soñ anı ansambl'gä repetitsiälärgä kiterä. Kompozitorlar äsärlären genä başqarıp qalmıy ul, üze dä cırlar icat itä. Rubis Zaripovnıñ Gölşat Zäynaşewa suzlärenä yazılğan «Yäşlek dustıma» isemle cırı belän Udmurtiädä tanılğan cırçı, respublikanıñ atqazanğan mädäniät xezmätkäre Zäkiä xanım İslamova Qazanda konkurslarda qatnaşıp, yaxşı bäya ala. Yazmış Rubis ağanı qabat tuğan yağı — Tatarstanğa, Çallı şähärenä alıp qayta. Uz möxitendä üzeşçän kompozitornıñ icat belän şöğellänü öçen mömkinlege tağın da arta, anın cırların da Çallıda tanılğan cırçılar üz repertuarına ala. Bu yıllardağı icatı küpqırlı dip äytergä mömkin, çänki biş distädän artıq cırlar yaza, şul uq waqıtta cırları tuplanğan kitabı dönya kürä, audiokassetası da cır söyuçeläre arasında tarala. Ağımdağı yılnıñ yaz aylarında Rubis Zaripov İjawğa, balalarına qunaqqa kilgäç, bezneñ redaksiädä dä bulıp kitkän ide. Ul oçraşuda min aña Udmurtiä cirendä yäşäp icat itkän şağir Dinar Abdullinıñ “İrtänge çıq tamçıları” isemle kitabın istelekkä tapşırğan idem. Bu kitaplarnı şağirneñ tormış iptäşe Saimä xanım, redaksiägä keşelär qup kilä, şiğerlär yaratuçılarğa birerseñ dip kitergän ide. Ul waqıtta Rubis ağa Zaripovqa: «Uqıp çığıp, bälki, berär şiğerenä köy dä yazarsız»,— dip östäp tä quyğan idem. Bezneñ oçraşudan soñ ozaq ta ütmäde, üzeşçän kompozitor Çallıdan şaltıratıp, Dinar Abdullinnıñ ber şiğırenä köy yazuın xäbär itte, xättä anı telefon aşa cırlap ta kürsätkän ide. Şuşı könnärdä Rubis ağa Zaripovnıñ İjawda eşe çığıp, forsattan faydalanıp, redaksiägä dä kerep çıqtı. Dinar Abdullin şiğerenä cırnıñ tuu tarixın da citkerde, yaña cırları belän tanıştırdı, berniçäsen küçtänäç itep qaldırdı.

Xamidä Ğayfullina, İjaw

XS
SM
MD
LG