Accessibility links

җомга, 9 декабрь 2016, Казан вакыты 08:48

Amerikada häm Tatarstanda elektr energiäse qıtlığı.


Mäğlümat çaraları Amerikadağı ut sününe, bu ildä soñğı 40 yılda iñ zur energetika krizisı dip atap ölgerde inde. Ä Rusiädä energetika ölkäseneñ imin genä eşlägäne dä yuq bit. Ütkän yılda Rusiäneñ küp kenä ölkäläre energetika krizisın kiçergän ide. Şuña kürä, utsız, suzıs utırğan qayber rusiä keşeläre amerikannarnıñ xälen añlıy bulsa kiräk. Tatarstan da bu yaqtan totrıqlılıq utrawı tügel. Tik bu mäs’älädä Amerika belän Tatarstan ber närsä belän ayırıla. Respublikada energetik sistemalar köç kilüdän tuqtamıy, bu tarmaq xezmätkärläre utnı üzläre sünderä. Ütkän atnada ğına, tapşıruıbızda küp kenä ere şirkätlärneñ «Tatenergo» oyışmasına elektr-energiäse öçen burıçlı buluın söylägän idek. Ğadi xalıqtan da aqçalar waqıtında kilep citmi, dip zarlana energetika tarmağına eşläwçelär. Sorap qarap ta, taläp itep tä, mäxkämä belän yanap ta, burıçlarnı qaytarıp bulmağan oçraqta ğına da, Tatarstan energetika xezmätkärläre utnı sünderä başlıy. «Tatenergo» oyışmasınıñ matbuğat xezmäte beldergänçä, berençe çiratta ut sänäğät şirkätlärendä sünderelä, ä fatirlardağı elektr energiäne alar özmäskä tırışa. Läkin burıçlar bik zur bulğan oçraqta, bu qağidä dä bozıla ikän. «Вечерняя Казань» gäziteneñ comğa sanında xäbär itelgänçä, Qazannıñ Sovet rayonında yış qına berniçä säğätkä ut sünderelä. Mäsälän, gäzit yazğança, şuşı rayon kommunal xucalıqlarına ber xalıq deputatı 12 meñ sum tieş. Anıñ kebek burıçların tülämi torğan başqa keşelär arqasında, böten yortta ut sünderelde. Ber yort qına tügel, burıçlar säbäple, Aqsubayda böten rayon üzäge kön sayın ber niçä säğätkä utsız qala. «Вечерняя Казань» gäzite yazğança, ayırım-ayırım tügel, ä kümäkläp sündergändä, burıçlar tizräk beterelä ikän. Şulay itep, Tatarstanda da, Amerikadağı energetika qıtlığınıñ awırlığın añlawçılar bar.

Bikä Timerova.

XS
SM
MD
LG