21nçe avgustta Qazanda qimmätle käğäzlär belän eşläwçe belgeçlärneñ V Bötenrusiä konferensiäse açılaçaq. Ul Rusiä Fond bazarınıñ töbäk öleşeneñ problemalarına bağışlana. Törle töbäklärdän kilgän däwlät oyışmaları wäkilläre, ğalimnär, eşmäkärlär, qimmätle qägäzlär bazarında qatnaşuçılar üzara xezmättäşlek turında söyläşäçäk, bu tarmaqtağı problemalar, alarnı çişü yulları turında kiñäşläşäçäk. Konferensiäneñ eşendä Tatarstan premyer-ministrı Röstäm Miñnexanov ta qatnaşır dip kötelä. Şulay itep, pänceşämbe könne Qazanda inde 5nçe märtäbä finans belgeçläre cıyılaçaq. Mäskäw säyäsätçeläre dä respublikanı iğtibar üzägennän töşermi. Saylawlar yaqınlaşqan sayın bu ayıruça sizelä başladı. Şul uq 21nçe avgust könne Qazanğa Rusiäneñ liberal’ demokratlar partiäse citäkçese, Däwlät Duması räise urınbasarı Vladimir Jirinovskiy kiläçäk. Ul Mäskäwdän pänceşämbe kiçke säğät 5tä kilergä tieş. Anı Qazannıñ timer yulı vokzalında qarşı alırğa inde äzerlänälär dä ikän. Şunısın da äytergä kiräk, Tatarstanğı LDPR tarafdarları ğına tügel, ä Bötentatar ictimaği üzäge wäkilläre dä. Düşämbe könne TİÜdä uzğan cıyılışta şuşı xaqta da süz barğan. Azatlıq radiosı xäbärçeseneñ, LDPRnıñ liderın niçek qarşı alırğa cıyınasız soñ digän sorawına, İctimaği üzäk citäkçese Räşid Yağfarov, niçek tieş şulay alaçaqbız dip kenä cawap birde. Xäyer, äle berniçä yıl elek kenä tatarlarnı Mongoliägä sörergä telägän Vladimir Jirinovskiynı alar çäçäk totıp kötep tormıyaçaqları bilgele inde. Şunısın da iskä töşerep ütik. Küptän tügel genä Tatar ictimağı üzäge wäkilläre Qazan uramnarındağı LDPR citäkçese räseme töşerelgän saylaw aldı plakatların alıp taşlarğa çaqırğan ide. Läkin plakatlar äle haman da elenep tora. Anıñ qarawı, pänceşämbe könne üzäk wäkilläre Qazan qunağı Vladimir Jirinovskiynıñ üzenä bar şikäyätlären dä citkerä alaçaqlar. Xäyer bu könnärdä Qazanda qunaqlar citärlek. İnde xäbär itkänebezçä, respublikada uquçı balalarnıñ berençe cäyge spartakiadası däwam itä. Çärşämbe könne älege yarışlarnıñ final öleşläre başlanıp kitte. 20-21nçe avgustta ger kütärü bäygeläre ütäçäk. Alarda qatnaşu öçen Qazanğa Rusiäneñ ger sportı federatsiäse citäkçese Mixail Panarskiy da kilde. 21se könne isä şaxmat buyınça yarışlar başlanaçaq. Şuşı uñaydan çärşämbe kiçen Qazanda Tatarstan prezidentı Şäymiev, tanılğan şaxmatçı Vladimir Kramnik, Rusiä şaxmat federatsiäse citäkçese Aleksandr Jukov qatnaşlığında telemost oyıştırıldı.
Gölnaz İlgizär
