Accessibility links

җомга, 9 декабрь 2016, Казан вакыты 05:10

Respubliкa köne cäyge yalnı tügäräkli...


Tatarstanda cäy mäşäqätläre baqça, yort-cir eşläre, balalar häm olılar yalın oyıştıru inde menä 13 yıl küñelle bäyräm belän yomğaqlana. Tatarstan möstäqillege turında deklaratsiä qabul itü, Respubliкa köne, tağın ber iseme Şähär köne, inde xalıq bäyrämenä äylänep bara. Bäyräm çaraları turında berniqädär söyläp kiläbez. Berençelärdän bulıp respublikada “Yaña ğasır“ teleradiokompaniäse bäyräm itä başladı. Älege kompaniä öçen uzğan çor oyışu, ayaqqa basu çorı buldı. Şulay da kompaniä şaqtıy ğına uñışlı programmalar ğämälgä quya aldı, üz auditoriäsen buldıruğa ireşte. “Tatarstan yaña ğasır” radiosına 26nçı avgustta ber yäş tuldı häm şuşı uñaydan radiomarafon ütkärelde. Sez radiomarafon barışında “Yaña ğasır” teleradiokompaniäse general' direktorı urınbasarı Miläwşä Aytuganovanıñ tıñlawçılar sorawlarına turıdan-turı efirda cawap birgän waqıtınnan ber özek tıñladığız. 27nçe avgust könne inde Qazanğa bäyrämgä qunaqlar kilä başlıy. Berençelärdän bulıp ber törkem jurnalistlar kilep töşä. Alar arasında çit il mäğlümat çaralarınıñ Rusiädäge wäkilçelekläre jurnalistları da bar. Jurnalistlar täwge eşläre itep “Märcäni” mäçetendä Tatarstan Diniä näzaräte räise möfti Ğosman İsxaqi belän oçraşaçaqlar. Ä Tatarstan jurnalistlarına bäyräm çaralarına çaqırular taratıla başladı inde. 27nçe avgustta Qazanda Çiläbe ölkäse könnäre başlana. Ölkä gubernatorı citäkçelegendä zur delegatsiä kiläçäk. Qunaqlar cıyılıp betkäç Qazanda bäyräm aldı çaraları başlana. İrtägä bäyräm digän könne Bauman uramındağı näşriät yortı qarşında “Yoldızlar alleyası” açıla. Yulğa iñderep yasalğan iñ berençe yoldızlar İlham Şakirovqa häm Älfiä Afzalovağa bağışlana. Bıyıl 30nçı avgust şimbä köngä turı kilde. Şuña kürä 1nçe sentäber - düşämbe kön yal köne dip iğlan itelde. Läkin 1nçe sentäber “Belem köne”ndä Tatarstanda barlıq mäktäplär dä açıq bula. Monı küptän tügel Ministrlar Kabinetınıñ yaña uqu yılı başlanuğa bağışlanğan brifingında Mäğärif ministrı Faris Xarisov belderde.

Yunıs Ätnäle.

XS
SM
MD
LG