Accessibility links

шимбә, 10 декабрь 2016, Казан вакыты 09:59

Däwlät cır häm biü ansamble citäkçese Rinat Wäliev: Bezneñ töp maqsatıbız – tatar xalqınıñ milli muzıkal’ traditsiälären saqlaw...


Berniçä yıl elek Tatarstannıñ däwlät cır häm biü ansamble turında respublikada bik yış yazdılar häm söylädelär. Bu, berençe çiratta, ansambl’neñ icatı belän tügel, ä, qızğanıçqa qarşı, icat törkemeneñ citäkçese Lima xanım Kustabaeva belän qatlawlı ayırılışu tarixına bäyle ide. Xäzer bu eşlär inde tarixta qaldı. Ansambl’dä ike distä yıllap eşlägän Lima xanım üzeneñ xaqiqäten isbatladı, ä cır häm biü ansamble aldında yaña burıçlar tora ide. Matbuğatta da älege törkem turında şaw-şular tınıp qaldı, anıñ eşçänlegen yaqtırtu da bik çamaladı ide. Ansambl’neñ citäkçelege dä, ällä inde artıq şaw-şulı iğtibardan tuyıp, mäğlümat çaraları belän bik aralaşmadı. Bälki şuñadır, 28 awgustta ansambl’neñ Qazannıñ Ostrovskiy uramında urnaşqan binasına matbuğat oçraşuına cıyılğan jurnalistlar küp tügel ide. Xäyer, bu söyläşüneñ bik cılı häm dustanä atmosferada ütüenä säbäp buldı. Çin tatarça itep, çäy tabını artında uzğan älege oçraşuda ansambl’neñ citäkçese Rinat Wäliev, baş xormeyster Venera Gäräeva, baş baletmeyster Railä Garipova, orkestr citäkçese Ferdinant Ğimadiev qatnaştılar. Cır häm biü ansambleneñ maqsatları turında süzne Rinat Wäliev başlap cibärde.

Här icadi törkemneñ üz missiäse bar. Bezneñ cır häm biü ansambleneñ töp maqsatı - tatar xalqınıñ milli muzıkal’ traditsiälären, anıñ fol’klorın, bay eçke mädäniäten saqlaw. Bez xalqıbıznıñ milli yözen saqlap qalırğa tieşbez



Şulay itep, 1938 yılda tatar xalqınıñ cır, biü, ğomumän muzıkal’ sänğäten saqlap qalu häm üsterü öçen oyıştırılğan törkem, inde menä 65 yıl üz maqsatına tuğrılıqlı bulıp qala birä. Xalıqnıñ bay mirasın onıtıp, zamança sänğät belän genä şöğellänergä yaramıy, dip sanıylar monda. Häm iñ awır waqıtlarda da alarnı yärdämnän taşlamağan respublika citäkçelegenä zur räxmätlären belderälär. Şunısın da äytergä kiräk, ansambl’neñ programmasında Qazan tatarlarınıñ ğına tügel, ä çit töbäklärdä yäşäwçe tatarlarnıñ, başqa xalıqlarnıñ icatı da urın alğan. Tatarstannıñ däwlät cır häm biü ansamble tatar xalqınıñ milli yöze, sänğäte belän dönyanı tanıştıra. Artistlar Tatarstan buylap ta, Rusiä kiñleklärendä dä, cit illärgä dä gastrol’lärgä yörilär, törle festival’, bäygelärdä bik yış qatnaşalar. Häm qayda ğına bulmasınnar – tamaşaçılarnı üzläreneñ ostalığı, tatar xalqınıñ bay icatı belän tañ qaldıralar.

Xäyer, ansambl’dä ireşkännär belän genä qänäğätlänergä cıyınmıylar. Kiläçäkkä plannar turında Rinat Wäliev söyli



Xäzer bez ike töp yünäleştä eşlibez. Berençese – üzebezneñ 65 yıllıq yubiley uñayınnan yaña konsert programmasın äzerläw. Xäzerge köndä yaña häm onıtılıp barğan cırlarnı, biülärne barlaw, rässamnar belän kostyumnar östendä eş bara. Bezneñ eşçänlekneñ ikençe yünäleşe – Qazannıñ meñyıllığına bağışlap tatar xalqınıñ bay tarixınnan ber küreneş äzerläw. Şulay uq ansambl’neñ gastrol’lärenä dä äzerlek däwam itä

Ansambl’neñ citäkçese Rinat Wälievkä östäp, törkemneñ tağın ber niäte turında äytäse kilä. Tizdän monda keräşen tatarlarınıñ icatınnan torğan maxsus programma da säxnägä quyılaçaq. Ansambl’ citäkçelegeneñ ğomumän plannarı bik zurdan. Läkin çabudan totıp torğan iñ zur problemalar – aqça citmäw häm ansambl’neñ üz binası bulmaw. Läkin bolar inde – xäzerge zamannıñ üzençälege disäñ dä bula. Respublika citäkçelege kiläçäktä dä yärdämennän taşlamasa, bez äle tamaşaçılarıbıznı bik ozaq şatlandıraçaqbız, dip sanıylar monda häm tatar muzıkal’ sänğäten yaratuçılarnı 1 oktäber könne Kärim Tinçurin isemendäge teatrğa yaña sezonnıñ berençe konsertına kötep qalalar.



Gölnaz İlgizär

XS
SM
MD
LG