Accessibility links

якшәмбе, 4 декабрь 2016, Казан вакыты 19:25

Saylawlar –2003. Başlana başlandı...


Här yal könnärendä Mäskäwdä ütä torğan säyäsi firqä cıyılışlarında Tatarstan keşeläre dä qatnaşa. Äle düşämbe könne genä Mäskäwdän Tatar ictimaği üzäge äğzäläre, «Rossiä» firqäse häm «Xalıq partiäse» tarafdarları Qazanğa qayttı. Säyäsi dairälärdä iñ qaynar tema xäzer- kem qaysı partiäneñ federal’ isemlegenä kergän. «Berdäm Rusiä» firqäse äle isemlegen iğlan itmäde. Kommunistlar firqäse isemlegenä, Tatarstannan 6 keşe kergän. Alar arasında Aleksandr Şaliy, Robert Sadıyqov, Näsimä Stolyarova häm sul köçlär tarafdarları arasında tanılğan başqa säyäsätçelär da bar.

«Rusiäneñ çın patriotları» isemendäge partiäneñ qorıltayı şuşı yal könendä buldı. Anda Tatarstannan 6 keşe qatnaştı. Älege cıyılışta bulıp qaytqan Räşit Yäğfärov xäbär itkänçä, tatar ictimaği üzäge ozaq waqıt saylağannan soñ dağıstanlı Räcäpov citäkçelegendäge elekke «İslam partiäse»n, ä xäzer «Rusiäneñ çın patriotları» isemen yörtüçe firqäne saylağan. Firqä isemlegendä 1nçe bulıp Räcäpov äfände üze tora, ikençe bulıp Tatarstan keşelärenä tanış bulmağan - tatar keşese, öçençe urında –milläte belän urıs bulğan firqä tarafdarları tora. Tatar ictimaği üzäk isemennän älege federal’ isemlekkä Ğayal Mortazin täqdim itelgän. İsemlek qorıltayda saylansa da, ul äle üzgärergä dä mömkin ikän. Elegräk, ictimaği üzäk älege firqäneñ Tatarstan bülegen oyıştırırğa yärdäm itkän. Ä xäzer ul respublika rayonnarı buylap, firqä sistemasın buldıru öçen tırışa.

Grigoriy Yavlinskiy firqäse tarafdarları da saylawlarğa äzerlek eşlären alıp bara. Ütkän yal könnärendä bulğan firqä qorıltayında Tatarstannan dä wäkillär qatnaşqan. «Yabloko» firqäseneñ Tatarstan bülege citäkçese Säläxov İldus İlyas ulı äytüençä, federal’ isemlekkä Tatarstannan 2 keşe kergän, häm tağın ber nämzät 1 mandatlı Mäskäw okrugına çığarğa isäpli. 3 nämzät turında süz barsa da, ğämäldä ul 2 genä keşe bula. Säläxov İldus äfände firqä isemlegendä bara, ä Sarafanov Oleg äfände ike isemlektä dä urın alıp tora.

Rusiä külämendä terkälgän firqälärneñ kübese Tatarstanda üz bülekçälären oyıştırdı. Dimäk federal’ isemleklärdä Tatarstan keşelären kürerbez äle. Şunıñ östäwenä firqäçelär Tatarstandağı Däwlät Şurasında da urın alırğa ömetlänep tora.

Bikä Timerova, Qazan.

XS
SM
MD
LG