Accessibility links

шимбә, 3 декабрь 2016, Казан вакыты 12:37

Ukrainada Tatarstan respublikası könnäre ütä...


24nçe sintäber könne, Tatarstan citäkçelegeneñ küpçelege Qazanda bulmadı. Nik disägez, Mintimer Şäymiev çärşämbedän yalğa çıqtı. Ä yal itärgä dip Törkiägä kitär aldınnan ul Tatarstan respublikasında däwlät xezmäte qanunına üzgäreşlär kertkän qanunnı imzalap qaldırdı. Premyer-ministr Röstäm Miñnexanov isä Ukrainağa kitte. İnde xäbär itkänebezçä, Miñnexanov citäkçelegendäge räsmi delegatsiä anda 24-26nçı sintäber könnärendä uza torğan Tatarstan respublikası könnärendä qatnaşa. Respublikanıñ Ministrlar Kabinetı matbuğat üzäge xäbär itüençä, Kievta bu könnärdä Tatarstan sänäğäte citeştergän tawarlar kürgäzmäse uzaçaq, ike respublika arasında törle tarmaqtağı xezmättäşlekne üsterü niätennän söyläşülär, tügäräk öställär ütkärü qaralğan. Röstäm Miñnexanov Ukraina xökümäteneñ premyer-ministrı Anatoliy Kinax belän dä oçraşırğa tieş. Şunısın da äytergä kiräk, Ukraina belän Tatarstannıñ xezmättäşlege şaqtıy kiñ, ul respublikanıñ töp tışqı iqtisadi partnerı bulıp tora. 2002nçe yılda Ukraina belän Tatarstan arasındağı tawar äyläneşe 512 million amerika dolların täşkil itkän. Şuşı könnär qısalarında ütäçäk söyläşülär häm oçraşular bu sannı tağın da arttırırğa bulışır digän ömet bar. Xäyer, älege çaranıñ maqsatı bulıp iqtisadi elemtälärne kiñäytü genä tormıy. Tatarstan könnäre qısalarında Kievta respublika sänğätkärläreneñ çığışları da qaralğan. Şulay uq, Qazannan kilgän qunaqlar Ukrainadağı tatar cämäğätçelege wäkilläre belän dä küreşergä tieş.

Qazanıñ üzendä dä qunaqlar citärlek. Başqalada küp kenä tanılğan ğalimnärne cıyğan Mendeleev isemen yörtkän XVİİ xalıqara ximiklar konferensiäse däwam itä. Çärşämbe kiçen anda qatnaşır öçen Yaponiädän Qazanğa ximik, Nobel’ premiäse lawreatı Riedzi Naori kilüe kötelä. Pänceşämbe könne isä Qazanda tağın ber fänni cıyılış üzeneñ eşen başlap cibäräçäk. «İdel buyı Urta ğasırlarda» dip isemlängän İİ Bötenrusiä konferensiäsenä Mäskäw, Samar, Ufa, Penza, Saransk tarixçıları cıyılaçaq. Cıyılıştağı çığışlar nigezdä Altın Urda çorı häm anı öyränü turında bula. 27-28nçe sintäberdä konferensiä üz eşen Yoşkar-Ola şähärendä däwam itäçäk.

XS
SM
MD
LG